Bryllaupshotellet gjekk mot straumen

Nett No-barometeret:

Inntektene og aktiviteten aukar, men hotella på Nordvestlandet tenar knapt pengar. Det er bildet som kjem fram i Nett No sin resultatoversikt for 2023.

Dei samla inntektene til hotellbransjen i regionen auka med drygt 14 prosent frå 2022 til 2023.

Samtidig fall lønnsemda – som allereie var på eit lågt nivå. Hotella som er med i oversikta hadde ein samla resultatmargin på under 0,7 prosent.

Rekordår på alle måtar i fjor
Ikkje alle følgjer mønsteret, og Hotel Union Geiranger er mellom dei som går mot straumen.

Hotellet som var åstad for årets mest omtalte hending i regionen – giftarmålet mellom Märtha Louise og Durek Verrett – la bak seg eit rekordår på alle måtar i fjor.

Geiranger-hotellet hadde ny solid auke i omsetninga og auka lønnsemda kraftig i 2023.

– Turistbesøket er i vekst og for vår del har det vore betre marginar etter at vi har vridd oss meir mot individuelle reisande, fortel Sindre Mjelva til Nett No.

Saman med kona Monja Mjelva, er han 4. generasjons vertskap ved det tradisjonsrike hotellet.

Håpar på fleire større oppdrag
Mjelva fortel at det kongelege bryllaupet ga dei mykje omtale, og fekk vist at hotellet kan slike arrangement. Samtidig følgde det med kostnader, som gjorde at oppdraget ikkje var gav noko økonomisk bidrag utover det som er vanleg for slike arrangement.

– Etterpå har vi fått fleire førespurnader om meir krevjande og teknisk avanserte arrangement, seier han.

Mjelva håpar på fleire slike og meiner hotellet er vist at til eksempel kan handtere internasjonale toppmøte, og tilsvarande arrangement.

– Eit nytt og utfordrande arrangement, til eksempel eit internasjonalt Nato-møte hadde vore bra, legg Mjelva til.

Færre gjestar frå offentlege aktørar
I år merkar Geiranger-hotellet at både den nasjonale og regionale marknaden er prega av at dei fleste har mindre å rutte med enn tidlegare.

Det gir spesielt store utslag i marknaden for kursing av offentlege tilsette og liknande.

– Den delen av marknaden er redusert, seier Mjelva.

Samtidig gjer kronekursen at Norge får meir internasjonalt besøk. Reisande frå USA er blitt ei viktigare gruppe, medan det er færre turistar frå Asia.

– Her merkar vi at krigen i Ukraina framleis pregar reiselivet globalt. Asia-marknaden er veldig redusert samanlikna med tidlegare, seier Mjelva.

– Har teke ut langt betre prisar
Quality Hotel Waterfront sine resultat samsvarer med utviklinga i bransjen elles. 2021 var eit år med solid overskot, medan marginane var langt knappare i 2022 og 2023.

Hotellsjef Victoria Synnes Rønne tør ikkje spå korleis lønnsemda endar på slutten av året, men fortel at auken i rominntektene viser at dei er på rett kurs.

– Vi har teke ut betre prisar i år enn tidlegare år på romma. Det er ei auke vi delar med bransjen i heile landet. Det er ei utvikling vi sjølvsagt er nøgd med, seier ho til Nett No.

Er blitt Ålesunds største hotell
Når det gjeld omsetninga, ligg Waterfront-hotellet godt framom fjorårets inntekter på drygt 70 millionar. Det er ikkje rart, ettersom dei opna heile 53 nye rom i midtvegs i 2023.

Utvidinga gjorde også at Waterfront no er byens desidert største hotell med 248 rom. På plassen bak følgjer Scandic Parken som har tett oppunder 200 rom.

Hotellsjefen fortel om rekordsommar og ein svært god septembermånad.

– I september har vi hatt nokre dagar med 100 prosent belegg. Vi har vore heilt fullbooka med utruleg stor pågang frå kurs- og konferansegjestar, seier ho.

Havila-underskot dreg ned lønnsemda
Resultatoversikta til Nett No inneheld omsetning og resultat før skatt for 43 hotell på Nordvestlandet i 2023 og 2022.

Tabellen viser eit samla resultat før skatt på drygt 8 millionar frå ei omsetning på nær 1,3 milliardar. Det gir ein resultatmargin på berre 0,7 prosent.

Tre hotell, Havila Geiranger Hotel, Grande Fjord Hotel og Volda Turisthotell, har ikkje levert rekneskapane enno. Havila-hotellet sitt endelege resultat kjem likevel fram i årsmeldinga til Havila Hotels As. Det viser et underskot på 4,3 millionar kroner.

Med andre ord er det reelle resultatet til hotella, endå svakare enn oversikta viser.

Det høyrer med til historia at fleire hotell, som Hotel Union Øye har gjort store investeringar, som tynger resultatet.

Bygger verdiar i eigedomsselskapa
Tabellen viser resultata for driftsselskapa til hotella. Ein del aktørar har skilt drift og eigedom i ulike selskap, som gir eit anna bilde av lønnsemda.

Classic Norway-konsernet med over 20 eigne hotell og fleire samarbeidshotell, er organisert på den måten. Eigar Erik Berg har vist til at strategien deira er å bygge verdiar i eigedomsselskapa.

– Så lenge vi ekspanderer, er det viktig å legge mesteparten av resultata våre på eigedom, sa Berg til Nett No tidlegare i år.