Kraftig Glamox-vekst

Belysningsprodukt-produsenten Glamox har aldri hatt større driftsinntekter enn i 2023, og har vekst både på lands og til havs.

I fjerde kvartal i fjor auka driftsinntektene med 10,6 prosent, samanlikna med 4. kvartal 2022. På årsbasis steig driftsinntektene med 14,5 prosent frå 2022 til 2023.

Mykje av veksten skuldast imidlertid effekten av ei svak krone. Glamox både eksporterer og har aktivitet i utlandet. Korrigert for valutaeffektar er veksten i driftsinntekter 2,4 prosent i 4. kvartal og 6,4 prosent på årsbasis.

Veksten kjem både i marknaden for belysningsprodukt til bygg og anlegg på land, og i marknaden for belysningsprodukt til offshoreinstallasjonar, skip og vindkraftbransjen til havs.

Resultatet før skatt gjekk ned (sjå tabell), først og fremst fordi selskapet investerer i auka kapasitet og tiltak som skal gi kostnadskutt i framtida, ifølgje årsrapporten.

Les årsrapporten til selskapet her

Byggdivisjonen er størst, med 3,2 milliardar kroner i driftsinntekter i 2023. Marindivisjonen hadde driftsinntekter på 1,1 milliardar kroner.

GLX Holding er eit selskap eigd av det internasjonale investeringsselskapet Triton for å eige Triton sin aksjepost på eig 76,17 prosent i Glamox-konsernet. GLK Holding konsoliderer heile Glamox-konsernet inn i sitt rekneskap (sjå tabell).

Glamox-konsernet har hovudkontoradresse i Molde, medan GLX Holding har adresse i Oslo.