Krillselskap ventar framleis på pengar

Etter dei opphavlege planane skulle krilltrålaren til Giske-selskapet Kitin vore i fiske etter den vesle krepsearten krill i Antarktis i år, men selskapet manglar framleis både fartøy og pengar.

1,5 milliardar kroner skulle hentast inn for å finansiere krillsatsinga skreiv Nett No i 2021.

Planen var å finansiere både båt og landanlegg. Landanlegget skulle ligge i Giske og vidareforedle fangsten.

I løpet av dei første åra var planen å satse primært på produksjon til oppdrettsnæringa, og etter kvart satse på fleire produkt inn mot forbrukarmarknaden.

Sunnmørsånda
Dagleg leiar og medgrunnleggar Nils Halvard Molnes seier til Nett No at selskapet framleis arbeider med å reise kapital for å invester i krilltrålaren, og at selskapet har kome lenger enn for eitt år sidan.

Den opphavlege konsesjonen gjekk ut i 2023, men blei forlenga. Molnes reknar med at selskapet får forlenga konsesjonen også ut over 20215.

-Det er Sunnmørsånda. Prosjektet er for godt til å leggast i ein skuff, seier Molnes om motivasjonen for å halde fram.

Fire på deltid
Då Kitinprosjektet vart lansert hadde selskapet fleire personar på lønningslista.

I dag er det han og tre andre som arbeider deltid med prosjektet, seier Molnes.

Like før Russland gjekk til krig mot Ukraina i 2022 hadde Kitin-selskapet investorane klare sa Molnes til Nett No i 2022.

Då krigen starta skaut prisane på stål og anna som trengst for å bygge eit skip i veret. Det vart både dyrare enn planlagt og også uråd å garantere kva bygginga til slutt ville koste.

- Vi måtte sette på bremsene, sa Molnes.