Kronerulling for søksmål om formuesskatten

Lars Oscar Fossen Øvstegård og medhjelparane har no oppretta Spleisen der dei ber om pengestøtte til å gjennomføre søksmålet mot staten.

Som kjent planlegg ørstingen å gå rettens veg for å fjerne formuesskatt på arbeidande kapital. Jussprofessor Mads Andenæs har sagt ja til å føre saka, og skal samarbeide med Carl Baudenbacher, kjent for arbeidet sitt med EØS og EU-rett.

– Om folk ønsker at dette skal gå heile vegen, så håpar vi dei vil bidra. Det vil også gjere det enklare for oss å halde fram dette dugnadsarbeidet vi har sett i gong, legg han til.

– Eg har kjempetrua
Øvestegård og medhjelparane har allereie lagt ned mange timars arbeid i førebuingane av søksmålet. Både han og fleire har også gått inn med betydelege beløp frå eiga lomme.

– Eg har kjempetrua og no kan alle bidra med små eller store beløp for å få løfta dette inn i rettsystemet på ein skikkeleg måte, seier Øvstegård.

Han spøkar med at dei kunne «lodde ut» sitteplassar i retten for dei som var ekstra ivrige etter å følgje saka på fremste rad. Samtidig er det ikkje tvil om at det er ei alvorleg problemstilling.

Spilka-sjef Terje Bøe er mellom dei som støttar arbeidet med søksmålet. Då Øvstegård sist veke møtte fleire politikarar på Stortinget om saka, deltok mellom anna Hilde Midthjell.

Ho er kjent som den første kvinnelege sjølvskapte milliardæren her til lands, etter å ha slått seg opp i kosmetikkbransjen. Øvstegård er samtidig tydeleg på at det langt frå berre dreiar seg om milliardærane.

– Det er viktig for oss å vise breidde i kampen som vi no fører, og då treng vi støtte frå både små og mellomstore bedrifter, seier han.

Frå før er det samla inn over ein million kroner til arbeidet. Etter eit knapt døgn var det kome inn 21.900 kroner på Spleisen, i tillegg hadde Øvstegård fått meldingar frå fleire som vil bidra.