– Kva anna plass enn i Møre og Romsdal skal vi klare det

Denne veka blei pressa invitert for å sjå produksjonen av det som skal bli verdas første oppdrettsmerd i stål. Målet er å starte storstilt serieproduksjon av eit nytt produkt i ein marknad som er venta å vekse betydeleg. 

Nyvinningen skal bli laga ved Vard sitt tidligere anlegg på Aukra og vil i første omgang sørge for arbeid til 50-60 personar. 

– Det er mykje meir komplisert å lukkast enn ein kanskje skulle tru. Samtidig kan vi vel seie at «kva anna plass enn i Møre og Romsdal skal vi klare det», seier Glen Bradley til Nett No. 

Meiner oppdrettsselskap er avgjerande
Rostein-toppen deltok på møtet med pressa på Aukra og understreka at regionen er i særstilling som kan løfte ein slik industriproduksjonen dei no startar på det tidlegare Vard-anlegget.

– Vi har maritim og marin kunnskap med verdsleiande miljø i Bauta og Rostein. Så har vi gått saman med Prophylaxia som har kunnskap om lakseoppdrett, både med landbaserte og lukka anlegg, seier Bradley. 

Han meiner oppdrettsselskapet frå Vestnes var avgjerande for at satsinga kom på plass. Dei skal leige merda frå samarbeidsselskapet Oceandock – der alle aktørane er med på eigarsida.

– Alle brikkane i verdikjeda må vere på plass, og dei blei avgjerande for å kunne realisere den første merda. No får vi også nærleik til utprøvinga og drifta, seier han.

– Startar med sal i heimemarknaden
Atlantic Sapphire-gründerane Bjørn-Vegard Løvik og Johan Andreassen er sentrale i oppdrettsselskapet, som har planar om å sette ut stålmerden ved sitt anlegg på Gjermundnes i Romsdalsfjorden.

Bradley peiker også på Hofseth-konsernet som eit anna relativt lite oppdrettsselskap frå regionen, som han meiner er frampå med å utnytte ny teknologi. 

– Det er gjerne slik i regionen vår at ting som blir ein global eksportsuksess, startar med sal i heimemarknaden. Om ein klarer å bygge ein heimemarknad får du etter kvart kunnskapen og verdikjeda du treng for å bygge eit selskap som kan skalere skikkeleg, la Bradley til.

Stor investering 
Prophylaxia-duoen Løvik og Andreassen legg ikkje skjul på at det er ei stor investering for selskapet deira. 

– Det er veldig artig at vi har industrielle krefter i regionen som hjelper kvarandre på denne måten, seier Bjørn-Vegard Løvik.

Prophylaxia er kontrollert av Alsco Aqua, som er eigd av Andreassen og Løvik. Selskapet omsette for 322 millionar i 2024. 

Trur på marknaden
Gjermund Kvernmo Langset som er daglig leder i Bauta Fishfarms og Oceandock fortel at dei ser store moglegheiter med produksjonen av stålmerdane.

I dag er kring 5.000-6.000 merdar i drift i sjøen av oppdrettsbransjen her til lands. Bauta-leiaren viser til målsetting om vekst i bransjen – og at dei ventar at mykje av veksten vil skje ved hjelp av lukka oppdrett. 

Dei er likevel avhengig av fleire ordrar for at produksjonen skal «ta av». 

– Vi ser at det er ein marknad som vi håpar vil kome, og då skal vi vere klare til å levere, sa Langset.

Han anslår at dei ville ha kapasitet til å lage kring 30 stålmerdar årleg på anlegga sine.