Lågare avgift på pelagisk fisk

Fiskeriminister Elisabeth Aspaker har vedteke å redusere marknadsavgifta for dei viktigaste pelagiske artane til 0,6 prosent med verknad frå 1. januar 2016.
Reduksjonen vil gi pelagisk fisk same avgiftssats som for laks og ørret.
Dette går fram av ei pressemelding som gjekk ut frå Nærings- og fiskeridepartementet i dag.

12 millionar mindre til Sjømatrådet

Marknadsavgifta finansierer verksemda i Norges sjømatråd. Ei endring av satsen til 0,6 prosent vil føre til at inntektene frå pelagisk sektor blir redusert frå om lag 56 millionar kroner til om lag 44 millionar kroner. Det vil seie ei nedjustering av Sjømatrådet sitt budsjett med om lag 12 millionar kroner (i 2014 tal).
Våren 2015 blei marknadsavgifta på laks og ørret redusert til 0,6 prosent, medan dagens nivå på 0,75 prosent blei oppretthalde for alle andre artar, inkludert pelagisk fisk
- Etter ei ny totalvurdering, mellom anna etter innspel frå næringa, har vi konkludert med at det er rett å sette ned også avgifta for pelagisk fisk, seier fiskeriminister Elisabeth Aspaker.

Pelagisk samling

Meldinga om avgiftsreduksjonen blei godt motteken mellom dei over 230 deltakarane som i dag er samla på Pelagisk Arena i Ålesund.
Arrangørar av den pelagiske storsamlinga er Norsk Sjømatråd og FHF.