La om kursen og vaks

Grunnleggar Frank Willy Utgård gjekk over til å konsentrere seg om produksjonen, medinvestor Bjørn Idar Lyngvær tok over oppgåvene som dagleg leiar, selskapet tilsette ein seljar og selskapet satsa på møblar for bedrifter, institusjonar og offentlege rom.

Det er oppskrifta bak at den vesle møbelprodusenten i Jarnes Møbler i Hundeidvika med fire tilsette, i fjor auka driftsinntektene med over ein million kroner.

Fem millionar i år
I år ventar selskapet passere fem millionar kroner i driftsinntekter, seier Lyngvær.

I tillegg til Utgård og Lyngvær er møbeldesignar Jarle Slyngstad medeigar i selskapet. Det er også han som teiknar møblane.

Lyngvær seier modellane er utforma slik at det går an å bygge ulike møblar basert på dei same komponentane, slik at antall deler i produksjonen kan haldast nede.

Selskapet har Møbeltre og PU Fabrikken i Sykkylven som underleverandør på trekomponentar, og blant andre Ekornes som underleverandør av skumprodukt og Gudbrandsdalen Uldvarefabrikk som tekstilleverandør.

Gitarnettbutikk og industri
I tillegg til Jarnes Møbler er både Utgård og Lyngvær engasjert i andre bedrifter.

Utgård er medeigar i nettbutikken gitarist.no. Butikken sel gitardeler og -tilbehør. Butikken er eigd av selskapet Garibaldi, som Utgård eig saman med Martin Foldal.

Lyngvær er eigar av Fishtech Hygena, som har spesialsiert på å lage tak og veggsystemer for hygieniske rom – frå produksjonslokale til sluser, laboratorium, operasjonssalar og andre typer rom med høge krav til hygiene.

Alle selskapa held til i Hundeidvika i Sykkylven.