Lagar havvindkjempe

Aker Solutions, DeepOcean og Solstad Offshore går saman og startar selskapet Windstaller Alliance, opplyser dei tre selskapa i ei børsmelding torsdag.

Det nye selskapet skal tilby komplette tenester innan offshore vind, men opnar også for å gå inn i andre fornybarsegment.

Selskapa har som mål å verte verdsleiande og den mest kostnadseffektive aktøren ved at ein felles skal kunne levere alle tenester innan offshore vind. Windstaller Alliance har som mål å verte ein såkalla "one-stop-shop-leverandør".

Offensive utsleppsmål
Samstundes set selskapa eit felles mål om å redusere utsleppa med 45-50 prosent innan 2030, og ha som mål om å verte nullutslepps-selskap.

Som ein lekk i denne satsinga skal Solstad Offshore oppgradere ein tredjedel av skipa til å få hybridløysingar innan 2025.

Solstad Offshore har ein flåte på 90 skip, der 15 skip i dag har batteri eller andre fornybarløysingar.

- Dagens leverandørkjede i offshore fornybarmarknaden er veldig fragmentert, og - etter vårt syn - suboptimal når det gjeld effektivitet, kostnader, risiko og miljøavtrykk. Windstaller Alliance skal ha ei integrert tilnærming der det passar, seier Guro Høyaas Løken, som skal leie det nye selskapet.

- Utan sidestykke
Adm. dir. Lars Peder Solstad i Solstad Offshore uttalar at når det gjeld kompetanse, størrelse og selskapsbase, vert det nye selskapet truleg utan sidestykke.

- Men det er korleis vi skal integrere og samarbeide om felles tilbod som vil skape den store verdien både for oss som leverandørar pg kundane, seier Solstad.