Lokal kapital berga Varda Care

Ålesund-firmaet Varda Care er spunne ut av velferdsteknologisatsinga til Helland Møbler-konsernet i Stordal.

Morselskapet i konsernet - Helland Eiendom - er største aksjonær i selskapet, med 43 prosent av aksjane før kapitalutvidinga og 22 prosent etter (sjå tabell under).

Selskapet auka eigenkapitalen med 5,6 millionar kroner, som er meir enn selskapet hadde sett seg som mål.

Adresse på Nordvestlandet
Som det går fram av tabellen under var fleire aksjonærar med adresse på Nordvestlandet med på kapitalutvidinga, og auka sin eigarandel.

Rieve Kapital er no nest største eigar med ein eigarandel på 12 prosent. Rieve Kapital er majoritetseigar i Møre Trafo i Sykkylven og er eigd av Rieve Kristiansen-familien i Ålesund.

Ingrid Rieve Kristiansen er også vald inn i styret. Ho er lege i spesialisering innan ortopedi ved Ålesund sjukehus.

Espen Remme overtar som styreleiar etter Johs Asphaug.

Måtte ha påfyll
Varda Care leverer sensorar som kan varsle om helsetilstanden til brukarane, og om brukarane treng hjelp frå pleiarar eller pårørande.

Å få gjennomslag i marknaden viste seg meir tidkrevande enn selskapet hadde sett for seg.

Nyleg fekk aksjonærane vite at dei måtte gå inn med meir pengar for å halde selskapet flytande.

Opphavleg hadde Vard Care tenkt å gjennomføre ei opa kapitalutviding.

Den planen er utsett etter råd frå Norse Securities, som rådde selskapet til å be eksisterande eigarar skyte inn meir pengar og utvikle marknaden meir, før selskapet ber nye investorar om pengar.