Lokaleigd sportskjede veks frå sju til ti butikkar

Det lokaleigde Sunnmøre Sport Holding-konsernet omfattar snart ti Intersport-butikkar på Nordvestlandet.

Konsernet som i fjor bestod av sju butikkar har nyleg kjøpt to nye Ålesund-butikkar. I tillegg opnar dei snart sin butikk nummer to i Volda.

– Då reknar vi å ha nok å gjere på ei stund, seier Frode Hofseth til NETT NO på spørsmålet om dei ønsker å vekse enno meir med det første.

Hofseth er av dei lokale eigarane som står bak det som etter kvart har blitt eit konsern med sportsbutikkar frå Stryn til Ålesund. Til dagleg leiar han i Ulsteinvik-butikken Intersport Hofseth, som nyleg er bygd om og utvida.

Blir betydeleg fleire tilsette
Frå mai kom Intersport Moa og Intersport Breivika innunder same paraply. Når Intersport Voldaportalen i tillegg opnar i august, har talet på tilsette som jobbar i konsernet vekse betydeleg det siste året.

– Dei to butikkane i Ålesund er relativt store, og har vore i eit anna system. Framover vil vi ha fokus på å få alt til å flyte skikkeleg, fortel Hofseth.

Ni av Intersport-butikkane i konsernet er heleigd av Sunnmøre Sport Holding. I B. S. Aure Sport, som driv intersport-butikken i Sykkylven, er dei deleigar.

Salsboom for turutstyr og elsyklar
Pilane peika opp for alle butikkane i konsernet i fjor. Både omseting og overskot auka for samtlege sju butikkar som då var med i den lokale sportskjeda.

– Eg trur det opplevdes ganske likt som i dei fleste sportsbutikkar med god vekst som følgje av pandemien på fleire felt, fortel Frode Hofseth.

I Ulsteinvik-butikken fekk dei salsboom for «alt» som hadde med tur og friluftsliv å gjere. Samtidig har auka sal av elsyklar bidrege til veksten under koronapandemien.

– Vi fekk også ein veldig bra vinter med godt skisal, legg Hofsteh til.

Samla omsetning for dei sju Intersport-butikkane i fjor var på kring 85 millionar kroner i 2021. Eit samla driftsoverskot på om lag 8,2 millionar, gir ein driftsmargin på tett oppunder ti prosent.

Merkar nedgang i sommar
Denne veka kom tal frå DNB om nordmenn sin kortbruk, som viser at bransjar som møbel, elektronikk og sportsutstyr opplever ein nedgang i omsetninga, samanlikna med i fjor.

I kjølvatnet av pandemien har også den lokale sportkjeda merka at folk har fått andre ting å bruke pengane på.

– Nokre ting merkar vi ekstra godt nedgang på, som telt og alle friluftsprodukt. Det har med fleire ting å gjere; vi hadde ein kjempeboost i fjor, i år har folk fleire valmulegheiter når dei skal reise på tur – og i tillegg har vi hatt mykje dårleg ver, påpeiker han.

Då er det ikkje rart at mange ikkje lar seg frist av teltturar og at butikken ved juli månad ligg litt bak budsjett. Men Hofseth håpar at det snur – og i første omgang kryssar han fingrane for betre ver.