Mistanke om salmonella i norsk storfekjøtt

(NPK-NTB): Nordfjord Kjøtt trekkjer tilbake karbonadedeig av både sitt eige merke og merket Prima etter mistanke om salmonella i eit parti norsk storfekjøtt.

Karbonadedeigen kan innehalde råvare frå eit parti norsk storfekjøtt der det er mistanke om salmonella.

Fleire kjøttprodukt har så langt i år vorte trekte frå butikkhyllene på grunn av salmonellautbrot, men til no har det vore snakk om importert kjøtt frå Tyskland.

Bakteriar innan slekta Salmonella er årsaka til sjukdommen salmonellose hos mellom anna husdyr og menneske. Det finst over 2.500 variantar av salmonella, ifølgje Veterinærinstituttet.

Undersøkjer
Bente Sande i Mattilsynet understrekar overfor NTB at dei framleis er på mistankenivå. Ho fortel at dei samtidig undersøkjer kva type salmonella det er snakk om.

– Salmonella i norsk storfekjøtt ikkje er så vanleg. Dei gongene det er oppdaga, har det ikkje vore sjukdom som kan smitte til folk. Den salmonella-arten finst naturleg i miljøet. Den kan ein få mange plassar, seier ho.

– Laboratoriet som undersøkjer, jobbar for fullt, men det varierer frå salmonella til salmonella kor lang tid det tek å få svar.

Varmebehandling
For begge Nordfjord Kjøttprodukta er det pakkar med siste forbruksdato 26. april 2021 som blir trekte tilbake. Produkta har vore selde i alle Rema 1000-butikkar, utanom i Troms og Finnmark, Oslo, Viken, Innlandet og Vestfold og Telemark fylke.

Forbrukarar blir bedne kaste eller returnere produktet til butikken det er kjøpt i for refusjon.

– Bakterien døyr ved tilstrekkeleg varmebehandling, og god kjøkkenhygiene og riktig varmebehandling gjer at ein unngår å bli sjuk dersom ein har ete av dei aktuelle produkta, understrekar selskapet i pressemeldinga.

(©NPK)