Mowi: – Ser ikkje dette som kroken på døra

Oppdrettsselskapet Mowi har i lengre tid hatt planar om å bygge eit anlegg for postsmolt – eller storsmolt – på Rovde i Vanylven.

No er det kome inn protestar mot etableringa frå både statsforvaltar, fylkeskommune, naboar og Naturvernforbundet, ifølgje Sunnmørsposten.

– Ingen overraskingar
Motsegnene handlar mellom anna om nedbygging av matjord og at utbygginga i strandsona vil skape ei barriere i landskapet som kan vere uheldig for vilt og den økologiske samanhengen.

Produksjonssjef John Ivar Sætre i Mowi seier til NETT NO at dei vil gå nærare gjennom innspela etter høyringsfristen er ute.

– Det er ingen overraskingar i at det kom innseiingar på desse punkta. Men vi ser ikkje på dette som kroken på døra, og vil ta dialogen med dei ulike etatane, kommunen og andre for å sjå om det er mogleg å få til ei løysing, fortel han.

Kan bli investering til 1,4 mrd.
Investeringa på Rovde er anslått til kring 1,4 milliardar. Reguleringsarbeidet for anlegget blei starta for fleire år sidan, og omhandlar kring 138 dekar – der ti dekar er fulldyrka jord.

I fjor fortalde Sætre til NETT NO at planane var eitt av fleire som var lagt i skuffen som følgje av usikkerheita med grunnrenteskatten på bransjen.

Der ligg strengt tatt planane framleis, ifølgje produksjonssjefen – som påpeiker at det ikkje er teke noko investeringsavgjerd.

– Vi har fullført dei fysiske byggeprosjekta som var i gong, og ført prosessane kring nye moglege anlegg vidare. Så får vi komme tilbake til kva tid dei ulike planane skal gjennomførast, seier Sætre til NETT NO.

Hadde mål om byggestart i fjor
Opphavleg skulle Mowi bygge eller utvide sju anlegg for postsmolt langs kysten. Før planane blei stoppa, var det eit mål om at alle anlegga skulle vere klare til 2027. På Rovde var håp om byggestart i fjor haust.

Men det var altså før grunnrenteskatten kom på bordet. I etterkant ga Mowi-sjef Ivan Vindheim beskjed om at investeringane ikkje blei teke opp att, før dei fekk ei skattebyrde som var berekraftig for næringa på sikt.

Mowi sine planar om ein fabrikk på Eggesbønes i Herøy, som skulle lage mjøl og olje av restråstoff, er mellom andre planar som er sett på hald.