Må ut for å vekse

Etter eit rekordår for Fora Form i 2019, fall omsetninga tilbake på meir normalnivå for møbelbedrifta i fjor.

– Vi har hatt kring 150-160 millionar i omsetning i fleire år, og opplever at det er vanskeleg å vekse meir her til lands, fortel supply chain manager Jonny Høstland i Fora Form til NETT NO.

Rekneskapen er ikkje offentleg enno, og Høstland vil difor vente med å gi ut dei konkrete tala.

Fora Form lagar møblar for kontraktsmarknaden til bedriftsmarknaden og det offentlege. Sofaene og stolane deira finst i alt frå kino- og konsertsalar, til venterom og flyplassar – og sjølvsagt møterom og kontor.

Satsar i fleire land
No aukar Ørsta-bedrifta innsatsen for å selje meir av møblane til utlandet. Mellom anna har dei sikra seg ein agent i Miami i USA og dei er til stades i Frankrike, Benelux og Finland.

– No satsar vi også i London. Vi har veldig trua på dette, og det blir spennande å sjå kva vi får til, legg han til.

I dag er Sverige den største marknaden utanfor Norge, medan dei også har fått fotfeste i Danmark.

– Kan lære mykje av Sverige og Danmark
Høstland ser positivt på etableringa av Eksportstrategirådet i Ålesund, som har kome som følgje av regjeringa sin nye eksportstrategi.

Samtidig er han utolmodig etter å få meir draghjelp frå styresmaktene i satsinga utomlands.

– Vi kan lære mykje av Sverige og Danmark. Her har dei vore langt flinkare til å hjelpe bedriftene ut av landet. Det er ingen grunn til at vi ikkje skal lukkast, legg han til.

(saka held fram under)

Snikkikk på nye produkt
I helga samlast design- og interiørarkitekturbransjen seg i Oslo til Designers Saturday. Saman med Fora Form, er Fjord Fiesta, LK Hjelle og Glamox representert frå Nordvestlandet.

– Det er første gongen eg er på dette, og er spent på konseptet, fortel Høstland.

I showrommet i Pilestredet kan besøkande få ein snikkikk på to produkt som ikkje er slept på marknaden enno – stolen Atrium og sofaen Senso Frame. Sistnemnte er ei vidareutvikling av deira desidert mest populære produkt. Senso-sofaene står gjerne for meir enn 40 millionar av den årlege omsetninga.

– For første gong kjem vi også med ei litt mjukare sofa kalla Otis, legg han til.