Nederlag for Støre om skipstunnelen

Tilhengarane av å bygge Stad skipstunnel vant eit lite slag i kampen for samferdsleprosjektet tysdag. 

Det er klart etter at eit fleirtal i Stortinget stilte seg bak forslaget frå Venstre, KrF og Senterpartiet om at Kystverket skal forhandle om prisen på tunnelen. 

Også Frp og Høgre sine representantar støtte forslaget i trontaledebatten, og sørga dermed for fleirtal. 

Truleg må tilhengarane smøre seg med tolmod til våren før det kjem eit svar på forhandlingane. 

– Det er vanskeleg å seie, men vi bør vere ferdige til påske, anslår Sveinung Nedregotten i Kystverket til Nett No. 

Fylkestinget bak om forhandlingar
Allereie då fylkestinget i Møre og Romsdal var samla tidlegare på dagen, vart det klart at det ville bli eit fleirtal for forslaget i Stortinget.

I fylkestinget fekk fylkesordførar Anders Riise (H) støtte til å sende ei uttale om saka, der dei ber regjeringa revurdere avgjerda om å skrinlegge prosjektet. 

Både Riise og Håkon Lykkebø Strand (Frp) var klare på at dei ønska at deira parti sentralt ville halde fram si støtte til å bygge skipstunnelen. 

Førstnemnte påpeika at det har vore lite framme i debatten at skipstunnelen har moms på 20 prosent, i motsetning til jernbaneprosjekt. 

Støre meiner tunnelen er for dyr
Det er eit poeng miljøorganisasjonen Bellona – som er letta over vedtaket – har merka seg.

– Eg tenkjer dei kan byrja med å ta ut momsen frå estimatet – så er dei nede med 2 milliardar berre der, sidan det er den reelle kostnaden for staten som blir diskutert her, seier seniorrådgivar for shipping i Bellona, Sigurd Enge, til NTB.

Statsminister Jonas Gahr Støre fortalde før helga at regjeringa hadde bestemt seg for å ta ut skipstunnelen frå statsbudsjettet for neste år, fordi den var blitt for dyr. 

Ifølgje Støre var prislappen som følgje av anboda som er kome inn, oppe i ein prislapp på 9,4 milliardar kroner.