Nogva lanserer el-motorar

Arbeidet til Nogva Motorfabrikk med å utvikle dei nye motorane har pågått i to-tre år.

Utviklingsarbeidet er ein konsekvens av at selskapet ser ein endra etterspørsel, og har pågått samstundes som selskapet har hatt sterk vekst med sine tradisjonelle forbrenningsmotorar - og framdriftssystem som el- og hybridmotorane no skal supplere.

- No etterspør marknaden hybrid og elektriske system, seier administrerande direktør Kjell Norvoll i Nogva Motorfabrikk-konsernet.

Konsernet har hovudkontor og produksjonsanlegg i Søvika, anlegg på Grytestranda og i Molde og serviceanlegg i Svolvær.

Eksportsatsing
Oppdrettsmarknaden, og fartøy til den, har vore ein viktig drivar for veksten til Nogva Motorfabrikk-konsernet dei siste åra og selskapet har også viktige kundar i fiskeri og ferjereiarlag.

Framover skal det satsast enda meir på eksport.

Markandsandelen i dei norske marknadane selskapet satsar på er blitt så stor at Norvoll meiner det er auka vekst i eksportmarknaden som er den mest fornuftige vegen å gå for å få meir vekst.

- Vi har ein relativt stor marknadsandel i dei segmenta vi vender oss til her heime. Det vil kanskje koste meire enn det smakar, seier han om å prøve å bli større i den norske marknaden.

Fleire folk
Konsernet sysselsette 106 årsverk i 2020, opp frå 98 året før.

Nogva Motorfabrikk har seks aksjonærar, der Nogva Norvoll Invest er størst med 50 prosent av aksjane. Nogva Norvoll Invest er eigd av Leidulv Åmund Nogva, Anne Nogva Norvoll og Kjell Norvoll.

Aksjonærane i Nogva Motorfabrikk tok ut 11 millionar kroner i utbytte etter 2020.