Ny forseinking for Havila Kystruten

Dei to Havila Kystruten-fartøya Havila Polaris og Havila Pollux er ikkje klare for å settast i trafikk på gods-og passasjerruta mellom Bergen og Kirkenes, og i dag varsla reiarlaget ytterlegare forseinkingar.

Les børsmelding her

Havila Polaris skulle starte å gå i rute frå Bergen 5. mars i år. Den avgangen er utsett på nytt, til 7. april. Grunnen er at sentralbanken i Irland enno ikkje har gitt den naudsynte lisensen som frir reiarlaget frå bindinga til sin opphavlege långivar , det statseigde russiske finansieringsselskapet GTLK.

Fann ny långivar
Etter det russiske angrepet på Ukraina i fjor vart selskap med lån frå GTLK råka av dei vestlege sanksjonane mot Russland og Havila Kystruten måtte finne ein ny långivar.

Det greidde selskapet. Lånet til GTLK blir betalt inn på ein sperra konto og skal stå der til sanksjonane er oppheva, men før den irske sentralsbanken - der GTLK har eit datterselskap - har godkjent opplegget er Havila Kystruten like langt.

Jordskjelv
Havila Pollux, som er under bygging på Tersan Shipyard i Tyrkia skulle starte på sin første tur frå Bergen 22. mars.

Denne veka har Tersan erklært force majeure på grunn av jordskjelvet i Tyrkia og Syria. Verftet blir ikkje ferdig som avtalt fordi mange av dei tilsette har reist til katastrofeområda for å hjelpe til med rednings- og opprydningsarbeidet.

Ny planlagt overleveringstidspunkt for Havila Pollux er i slutten av april.