Ny frist for kriseløysing

Olympic Subsea har fått nok ei utsetting for å kome til ein avtale med alle långivarane om ein ny finansieringsløysing.

Den nye fristen er i løpet av september månad, ifølgje rapporten for andre kvartal, som ble gjort offentleg i ei børsmelding onsdag.

Vil redusere gjeldsbyrda
Forhandlingane om ei refinansiering blei først varsla då selskapet la fram rekneskapen for 3. kvartal i desember 2019, og fristen er utsett ein rekke gongar.

Tidleg i august kunne Olympic melde at dei hadde sikra støtte frå eit fleirtal av bankane om ny profil på avdraga for gjelda, og at dei hadde frist ut månaden for å kome til einigheit.

Den nye avtalen vil redusere den årlege gjeldsbyrda betydeleg, gi tilstrekkeleg kontantbalanse og betre finansielt armslag, ifølgje reiarlaget.

Betre lønnsemd
Olympic-tala viser betre lønnsemd enn i fjor, men det er framleis minus-resultat før skatt for halvåret.

Tala i andre kvartal, trekk opp resultatet kraftig. Då segla reiarlaget inn 175 millionar, og fekk eit driftsresultat på 50 millionar. For Kvartalet enda resultat før skatt på knappe 13 millionar i pluss (sjå tabell under).

Reiarlaget hadde ni av ti skip i aktivitet i andre kvartal og dei jobbar i første rekke i fornybar energi og subsea-markanden. Leiinga trur på auka aktivitet i subsea, og at fornybarsegmentet vil vekse på lengre sikt, heiter det i rapporten.