- Trass i tøff konkurranse og press på marginar, auka driftsresultatet vårt med nesten 20 millionar. Dette er oppnådd gjennom fantastisk innsats fra alle våre tilsette, samtidig som vi har hatt god kapasitetsutnytting.
Det seier dagleg leiar Hans Petter Selstad etter at konsernet sette solide nye rekordar i 2020.
Måløy-selskapet hadde i fjor eit resultat før skatt på 36,2 millionar kroner. Selskapet omsette samstundes for 579,9 millionar kroner. Begge deler er rekordar.
Bedrifta har vakse jamnt og trutt sidan starten for over 60 år sidan. Med unntak av 2009, har omsetninga auka kvart år sidan 2003. Då omsette Måløy-selskapet for 77,1 millionar kroner.
(saka held fram etter tabellen)
| Selstad | |||
| Årsresultat (i mill kr) | 2020 | 2019 | |
| Driftsinntekter | 579,9 | 485,1 | |
| Driftsresultat | 42,9 | 23,2 | |
| Resultat før skatt | 36,2 | 17,8 | |
Skotsk oppkjøp
Selstad sel fiske- og oppdrettsutstyr, mellom anna oppdrettsnøter, og driv også med tauproduksjon og produksjon av sikkerheitsutstyr.
Hovedbasen er Måløy, men selskapet har avdelingar i Tromsø, Senjahopen, Andenes, Svolvær, Oskedal, Solund og Ålesund.
Men no skal selskapet vekse endå meir etter at Selstad i mars i år kjøpte aksjemajoriteten i den skotske fiskevegnprodusenten W & J Knox med 70 tilsette.
- Gjennom 2021 ser Selstad framleis vekst, og med oppkjøpet av W&J Knox er prognosa ei omsetning på 1,1 milliardar for Selstad-konsernet i 2021, seier Hans Petter Selstad.
Les også
Norge dominerer
Selstad på sin side hadde ved siste årsskifte 193 tilsette, derav 38 kvinner.
Selskapet har ein samla eigenkapital på 94,2 millionar korner og ei langsiktig gjeld på 36,2 millionar.
Det aller meste av omsetninga skjer til norske kundar. I fjor gjekk 523,9 millionar til Norge.
98,65 prosent av selskapet er eigd gjennom Selstad Holding, der dagleg leiar Hans Petter Selstad er største aksjonær.
Eigarane kan for fjoråret fordele eit utbyte på 20 millionar kroner.
Publisert: 18.10.2021 09:15
Sist oppdatert: 18.10.2021 20:28
