Nytt rekordutbytte for Jets-eigarane

2023-rekneskapen til Jets viser at det drypp godt på eigarane etter nok eit godt resultat for Hareid-bedrifta.

Både omsetning og overskott gjorde nye byks i fjor og sørga for at bedrifta sette nye rekordar på dei fleste vis, kunne Nett No fortelje i mars.

Ny toalettløysingar til alt frå supermarknader, mobile anlegg, næringsbygg, hytter og småhus, har vore vekstmarknader for konsernet dei siste åra, i tillegg til den maritime bransjen.

Store utbytter
I årsmeldinga frå Jets Vacuum-selskapet som no er offentleg, går det óg fram at det vart teke nytt rekordutbytte på 65 millionar kroner.

Året i forvegen – som også var eit svært godt år for bedrifta – vart det teke ut 58 millionar kroner.

Eit tilbakeblikk på rekneskapane viser at det sidan 2016 er teke 308 millionar i utbytte frå selskapet Jets Vacuum.

«Eventyrleg god» ordreinngang i 2024
Jets-sjef Øyvind Tørlen omtala 2023 som eit år med lønnsemd utover det normale med vekst i alle marknader, då han fortalde om resultatet i mars.

Ei omsetning på 717 millionar og overskott på 170 millionar gav óg rekordbonusar for dei tilsette.

Tørlen kunne vidare fortelje at 2024 hadde starta med ein «eventyrleg god» ordreinngang.

Fekk ny hovudeigar i 2021
Rune Stokke med familie er hovudeigarar i konsernet Jets som er ein del av med Stokke Industri As som morselskap. Stokke kom først inn som minoritetseigar i Jets 2017/2018. Seinare kjøpte dei seg vidare opp i 2021.

Stokke Industri investerer i fleire ulike bransjar og er familieselskapet til Rune Stokke og Maria Loen. De har ein verdijustert forvaltningskapital på 3,8 milliardar i 2024, ifølgje heimesida deira.

Eigenkapitalen i Stokke-selskapet har vekse jamnt og trutt. Ved utløpet av 2022 var den på nær 2,7 milliardar og den langsiktige gjelda på drygt 11 millionar.

Også i Stokke Industri er det teke solide utbytter dei siste åra, med 20 millionar i 2022 og 118 millionar året før. Rekneskapen for 2023 er ikkje klar enno.

Øvstehus As som er eigd av Aksel, Eimund og Øystein Øvsthus, har 15 prosent av aksjane i Jets-selskapet. Hagard As som er eigd av Haddal-familien har fem prosent av aksjane.