Stokke Industri majoritetseigar i Jets

Stokke Industri har kjøpt seg opp frå 39 til 73 prosent av aksjane i Jets på Hareid, ifølgje ei pressemelding fredag.

Hofseth- og Haddal-familiane som tidlegare eigde 20 prosent kvar av Jets, vil sitte att med fem prosent av aksjane kvar.

Stokke Industri er familieselskapet til Rune Stokke, Maria Loen og deira barn. I tillegg er Geir Løseth og Thomas Øybø med som partnarar.

Trur på global vekst
Stokke-selskapet gjer investeringar mellom anna eigedom og selskap, og gjekk inn i Jets i 2018. No var tida inne for å auke eigardelen.

– Vi trur selskapet har moglegheit til å gjere ein forskjell og at teknologien kan få stor utbreiing globalt utover skipssegmentet, der Jets allereie er store. Stokke Industri vil legge sin fulle kraft bak selskapet, uttalar Rune Stokke i meldinga.

Thomas Øybø som er administrerande direktør i Stokke Industri og styremedlem i Jets Vacuum, meiner bedrifta er i ei brytningstid, og vil gå frå å vere ei mellomstor bedrift til å vekse vesentleg.

(saka held fram under)

Rekordår i 2019
Hovudverksemda til Jets er produksjon og sal av toalett med eigenutvikla vacuumteknologi.

2019 blei eit rekordår både når det kom til omsetning og lønnsemd.

Selskapet har i årevis levert toalettløysingar til skip og båtar, men har dei siste åra teke steget over i nye marknader som hytter og småhus, supermarknader, mobile sanitæranlegg og næringsbygg. Satsinga mot tog-marknnaden er lagt ned.

Sel livsverket til faren
Jets blei etablert av Olav Hofseth i 1986. Nokre år seinare, kom Kåre Audun Haddal inn og bygde selskapet vidare.

Styremedlem og eigar Hilde Hofseth uttalar at det ikkje var ei lett avgjerd å selje livsverket til faren, men at den hadde modna over tid.

Hans Haddal, som er eigar og representant for Haddal-familien, seier samarbeidet med Stokke har vore bra, og at dei trur selskapet er rett eigar til å ta Jets vidare.