Offshore-oppsving i april

Både store og mindre plattformforsyningsskip i Nordsjøen fekk  langt betre betalt i april 2026, enn i april 2025. Det viser aprilutgåva av Seabreeze, månadsrapporten frå meklarselskapet Seabrokers.

I spotmarknaden, der skip blir leigd ut for kortare oppdrag, auka leiga i april med 97 prosent samanlikna med same månad i fjor. Det gjeldt for begge typar forsyningsskip.

I gjennomsnitt vart eit mindre forsyningskip leigd ut for 24.570 pund om dagen (ca 308.600 kroner dagen) og eit større forsyningskip for 25.392 pund (ca 331.800 kroner).

Betre enn mars
Samanlikna med mars i år er det også rateoppgang, 122 prosent opp for dei mindre og 86 prosent opp for dei større forsyningsfartøya.

I april auka også utnyttingsgraden frå 69 til 85 prosent for dei mindre skipa, og frå 67 til 89 prosent for dei større forsyningsfartøya. Utnyttingsgraden fortel kor stor del at tida skipa er i betalt drift. 

Rekord for ankerhandteringsfartøy
Nett No har tidlegare fortalt om rekordratar for ankerhandteringsfartøy i Nordsjøen i mars. Dette er båtar som mellom anna blir brukt til store slep, som å flytte på boreriggar. 

For større ankerhandteringsfartøy er det snakk om ein rateoppgang på 193 prosent i april samanlikna med april i fjor, og 29 prosent samanlikna med mars i år. I april var betalinga 117.150 pund om dagen i gjennomsnitt (ca 1,5 millionar kroner dagen)

Gjennomsnittsratene for mindre ankerhandteringsfartøy var nesten like høge, opp 46 prosent samalikna med for eitt år sidan. 

Utnyttingsgrad i april var høvesvis 56 prosent for dei mindre ankerhandteringsfartøya og 63 prosent for dei større.