Oljekrisa har ført til 25.000 færre arbeidsplassar

(NPK-NTB): Det viser ferske tal frå Statistisk sentralbyrå (SSB).
Sysselsettinga i oljebransjen og næringar som leverer tenester til oljebransjen, vart redusert med heile 25.000 personar, frå 232.000 i 2013 til 207.000 i 2015, ifølgje ein rapport frå .
Det svarar omtrent til auken i arbeidsløysa i same periode. Den kraftige nedgangen har ført til at sysselsettinga knytt til oljebransjen vart redusert frå 8,7 prosent av samla sysselsetting i 2013 til 7,5 prosent i 2015.

Nedgang for verft

I same tidsrom gjekk sysselsettinga i sjølve oljebransjen ned med rundt 2.500 personar. Dette utgjer berre 10 prosent av sysselsettingsnedgangen i alle næringar knytt til petroleumsnæringa.
Det er nemleg bransjar som leverer tenester til oljebransjen som har tapt mest på den reduserte aktiviteten i Nordsjøen. Målt i talet på sysselsette er kategorien «annan privat tenesteyting» den viktigaste. Denne kategorien inkluderer blant anna bemanningsbyrå, og her viser tala at berre bemanninga er redusert med i overkant av 10.000 personar, frå rundt 90.000 tilsette i 2013 til i underkant av 80.000 sysselsette i fjor.
Elles er det særleg verfts- og verkstadindustrien som merkar nedgangen med 62.400 sysselsette i 2013 til 54.400, ein nedgang på 8.000 sysselsette.
Oljenæringa er svært viktig for Noreg. Investeringar, produktinnsats og lønnskostnadar utgjer heile 13,3 prosent av det totale bruttonasjonalprodukt på fastlandet i 2013. (©NPK)