Onrail har mangedobla inntektene

Det som i 2020 var eit lite gründerselskap i togbransjen har vekse kraftig i løpet av det siste året. Togselskapet Onrail på Åndalsnes har starta opp ein rekke nye ruter som har mangedobla omsetninga.

– Vi har gått frå å vere eit lite selskap til å bli ein mellomstor aktør. I år reknar vi med å omsette for kring ein kvart milliard, fortel dagleg leiar Henning Aandal til NETT NO.

Det er litt av eit hopp frå 2022-omsetninga på 37 millionar kroner. Framleis er det eit stykke opp til dei største bedriftene i Rauma, men togselskapet er i ferd med å ta steget inn på topplista over selskapa med størst omsetning i kommunen.

Har sikra fleire store kontraktar
Årsaka til auken er at Onrail frå februar har køyrt tre daglege to mellom Oslo og Bergen, i tillegg til daglege avgangar til og frå Stavanger og Trondheim.

Sjølv om det har vore stopp for godstrafikken på Raumabanen i vekevis, utgjer det med andre ord ingen fare for totaløkonomien i selskapet.

– Vi er veldig glade for desse kontraktane og utan dei hadde vi vore i skikkeleg trøbbel, seier Aandal.

Kan ta lang tid med ny bru
Årsaka til stansen i godstrafikken er at Randklev bru ved Ringebu kollapsa under ekstremvêret Hans.

No ventar Onrail-sjefen på ei tilbakemelding frå Bane Nor om kva som skjer med brua som har kollapsa. Det raskaste alternativet er truleg å bruke om igjen brua som har falle i elva. Viss ikkje må det byggast ny bru.

– Då tek det mykje lengre tid, legg Aandal til.

Kan bli utfordrande å starte opp att
Onrail-sjefen fortel at dei håpar å snart kome i gong att med drifta på Raumabanen, og at dei ser på strekninga som «babyen» deira – der det heile starta.

– Men når kundane har inngått avtaler om lastebiltransport, er det ikkje sikkert at dei er på plass, sjølv om toga kjem i rute att, påpeiker Aandal.

I tillegg kan det vere utfordringar med å omplassere lokomotiva til Raumabanen, om det er behov for dei på andre ruter.

– Men Åndalsnes-toget kommer uansett tilbake igjen om næringslivet i Møre og Romsdal gir oss nok godsvolum å transportere, legg han til.