Oppbod for tømrarfirma med 18 tilsette

Møre og Romsdal tingrett opna måndag konkurs i selskapet Harang & Håndlykken.

Ålesund-firmaet hadde 18 tilsette då verksemda blei innstilt og leiinga melde oppbod. Retten har fått opplyst at selskapet har gjeld på kring 2,4 millionar, og at det er verdiar for kring éin million.

Bustyrar i saka er Bjørn-Ivar Borgund og første skiftesamling er planlagt 7. oktober.

Gjekk med underskot i fjor
Harang & Håndlykken blei starta i 2026 og har drive både med ombygging og rehabilitering, nybygg, prosjektering og teikning.

Selskapet har omsett for mellom 20 og 25 millionar dei siste åra. 2023-rekneskapen viser eit underskot på 1,5 millionar. Også 2021 gjekk i minus.

Eigenkapitalen var ved utgangen av 2023 på knappe 140.000 kroner og langsiktig gjeld på kring 480.000 kroner. Då hadde dei óg kundefordringar på drygt 2,5 millionar kroner, viser årsmeldinga for det året.

Éin av tre konkursar i bygg- og anlegg
Bygg- og anleggsnæringa har i fleire år vore høgt oppe på lista over bransjar med flest konkursar i regionen. Slik er det framleis.

Inkludert oppbodet i Ålesund-firmaet måndag, er det opna 134 konkursar så langt i år i Møre og Romsdal. Av desse er 42 frå bygg- og anleggsbransjen.

Det utgjer om lag ein tredel, og er på same høge nivå næringa har vore på dei siste åra. Til samanlikning har det vore 22 konkursar i varehandel, 11 i overnatting og serveringsbransjen og 10 i industrien så langt i år i fylket.

Talet på konkursar samla haldt seg stabile på Nordvestlandet første halvår i 2024, samanlikna med i fjor.