Plussresultat trass klippfisksmell

Brødrene Sperre på Ellingsøya er det klart største selskapet i Sperrefish-konsernet, og er også ein av dei største klippfiskprodusentane i Noreg.

Før koronakrisa kom hadde selskapet kjøpt inn storparten av torsken selskapet skulle produsere klippfisk av gjennom 2020, til gode prisar - for fiskarane.

Produserte og selde med tap
Konsekvensen av koronakrisa blei mellom anna at etterspørselen etter klippfisken fall i så godt som alle marknadar, medrekna Brasil og Portugal. Dermed fall prisen på klippfisk, etter at råvara til klippfiskproduksjonen alt var kjøpt og betalt.

- Vi produserte og selde fisk gjennom 2020 med tap, seier styreleiar Inger Marie Sperre i Sperrefish-konsernet om klippfiskmarknaden i fjor.

I år er råvarekostnadane lågare, og forventningane til eit betre klippfiskår stigande.

- Vi ser ganske lyst på 2021, seier Sperre.

Bygde nytt på Ellingsøya
Brødrene Sperre hadde 1,9 milliardar kroner i driftsinntekter og eit resultat før skatt på minus 44 millionar kroner i fjor.

Ei om- og nybygging av det pelagiske anlegget hos Brødrene Sperre gjorde at selskapet leigde produksjonskapasitet for pelagisk fisk (sild, makrell og liknande fiskeslag) hos eit anna selskap på Ellingsøya, Nils Sperre, under bygginga.

Det fordyra produksjonen, og medverka og til at 2020 blei eit minusår.

Bygginga omfatta og nye lokale for garderober og kantine, og utgjer ei investering på 130 millionar kroner, følgje Sperre.

Pelagisk greidde seg godt
Hos store klippfisknasjonar som Portugal og Brasil, er restaurantmarknaden viktig for klippfiskeksportørane. Koronastengte spisestader og smittevernrestriksjonar råka restaurantane og dermed også klippfiskeksportørane.

Marknaden for pelagisk fisk har ikkje blitt sterkt råka av den verdsomfattande koronapandemien.

Vikomar (50 prosent eigd), som er eit reindyrka pelagisk industriselskap, auka driftsinntektene frå 533 i 2019 til 669 millionar kroner i 2020. Resultatet før skatt steg frå 19 til 48 millionar kroner .

Sevrin Tranvåg i Sula (90 prosent eigd), som Brødrene Sperre kjøpte i 2018, driv som Brødrene Sperre både med klippfisk og pelagisk fisk. Sevrin Tranvåg hadde 354 millionar kroner i driftsinntekter i fjor mot 290 i 2019. Resultatet før skatt gjekk frå minus 1,5 til pluss 2,8 millionar kroner.