Prosjektleiar startar i ny jobb

Omstillingsprosjektet Vekst i Hareid går over i ei ny fase og i samband med dette, sluttar prosjektleiar Julie Sundgot Andersen i si stilling, ifølgje ei pressemelding.

Andersen skal tilbake til maritim industri og startar i ei nyoppretta stilling i Entec-selskapet Evotec i juni.

På jakt etter ny prosjektleiar
– I arbeidet med Vekst i Hareid har prosjektleiar, saman med eit sterkt styre, utvikla og etablert eit viktig fundament i næringsutviklinga i Hareid kommune. Ein har gradvis spissa satsinga i prosjektet og styret har sterke ambisjonar for vegen vidare, skriv styreleiar Karl-Johan Bakken i meldinga.

Styret vil no gå i gang med tilsetting av ein ny prosjektleiar.

– Her vil det vere spennande moglegheiter for den rette kandidaten, skriv Bakken vidare.

Rår til ny millionstøtte
Omstillingsprosjektet starta med eit forprosjekt i 2019, og hovudprosjektet året etter. I tillegg til prosjektleiar i full stilling, er ei styringsgruppe frå næringslivet, politikken og kommuneleiinga involvert i arbeidet.

Prosjektet får midlar for eitt år av gongen frå fylkeskommunen. Vidare støtte til arbeidet skal opp i neste vekes møte i kompetanse- og næringsutvalet.

Fylkeskommunedirektøren rår politikarane til å løyve tre millionar kroner.

Har bidrege til 124 arbeidsplassar
I sakspapira kjem det fram at prosjektet til no har bidrege til 124 arbeidsplassar.

– Vi hadde eit mål om å sikre, eller skape 200 arbeidsplassar innan sommaren 2025. Vi er på god veg og med prosjekta som er i gong og planen for det komande året, ser vi at det er mogleg å kome i mål, seier Andersen til Nett No.