På veg til dåp i Vesterålen

- Med fråtrekk av juleferie og påskeferie, har vi brukt rundt fire månader på å utruste båten, seier verftsdirektør Jarle Gunnarstein.
Den 38,65 meter Naval Consult-designa Kystbåten er bestilt av Kristoffersen Fiskebåt i Myre.
Skroget er bygt ved polske Safe Sp i Gdansk, medan resten av arbeidet er gjort ved Sande-verftet
- Kontrakten vart signert 30. august i 2016, og skroget levert 26. oktober i 2017, seier Gunnarstein.

Mange nybygg

Han opplyser at det er rekordhøg aktivitet ved verftet.
Til utrustning ligg no den 82 meter lange brønnbåten Ro Fortune.
- Denne båten skal leverast i løpet av mai månad, seier Gunnarstein.
I månadsskiftet mai/juni kjem skroget til den 46 meter lange fiskebåten Hovden Viking, den tredje Larsnes-bygde båten til Selje-reiarlaget.
- Båten skal leverast i haust.

Shetland-prosjekt

I mai/juni kjem også skroget til den 43 meter lange fiskebåten Nordhavet til reiarlaget Arvesen i Troms.
- Denne båten skal leverast i slutten av året.
I tillegg har verftet signert kontrakt med Zephyr Fishing Company Ltd. Lerwick, på Shetland, om bygging av ein 75,4 meter lang og 15 meter brei pelagisk trålar.
- Skroget kjem til Larsnes i løpet av desember, og båten skal overleverast i mai/juni neste år, opplyser Gunnarstein.

Tørrdokk

Verftet har nyleg tatt i bruk ein ny hall på 840 kvadratmeter, ein hall som mellom anna rommar rørverkstad og lager.
Neste plan er å byggje ei tørrdokk på rundt 120 meter i lengde og 23-24 meter i breidde.