Rekordhøg omsetning berga ikkje plussresultat

Pilene peiker rett veg for den økonomiske drifta av skisenter, restaurant og servicesenter på Strandafjellet. Det viser rekneskapa for tre av fire dotterselskap i Strandafjellet Holding.

Strandafjellet Skisenter auka omsetninga kraftig og sette ny rekord i fjor med meir enn 24 millionar i driftsinntekter.

Det ga eit positivt driftsresultat, men resultat før skatt enda likevel i minus (sjå tabell under). Selskapa har avvikande rekneskapsår og sluttar året i oktober.

Strandafjellet er ein populær destinasjon både sommar og vinter.

I vinterferien fortalde dagleg leiar Helge Ibrahim ved Stranda Booking at det var heilt fullt på overnattingsplassane i bygda, og at talet på utlendingar som kjem om vinteren no er på høgde med åra før pandemien.

Stranda Restaurantdrift As auka inntektene betydeleg i fjor og enda med ei omsetning på ni millionar kroner.

Selskapet som mellom anna driv kafé, bar, restaurant og møterom med konferanselokale, hadde også sitt første år med pluss på botnlinja (sjå tabell under).

Stranda Skiservice driv med utleige og service av skiutstyr på Strandafjellet, hadde også eit toppår på inntektssida – og fekk ein solid lønnsemd med nær ein halv million kroner i overskot før skatt.