Rekordkontrakt for Marina Solutions

Marina Solutions skal levere to store flytemoloar på 57 gange 8,5 meter, med fire ventemerder for laks på innsida. Anlegget skal være på plass ved Cermaq sitt lakseslakteri i Rypefjord ved Hammerfest om eitt år, skriv Marina Solutions i ei pressemelding.

Kor stor kontrakten er i kroner er ikkje opplyst, men det er den største einskildkontrakten Marina Solutions nokon gong har fått, ifølgje pressemeldinga.

– Det er alltids godt når signaturen kjem på plass, og prosjektet dermed blir konkret og handfast, seier dagleg leiar Torgeir Iversen i pressemeldinga.

– Fått fleire forespørslar
Marina Solutions-sjefen seier selskapet har arbeidd med å utvikle anlegget i lang tid.

Iversen er denne veka på oppdrettsteknologi messa Aqua Nor i Trondheim, og fortel om stor interesse for anlegget.

– Vi har allereie fått fleire forespørslar frå andre, som vi skal rekne på, seier Iversen til NETT NO.

Bygd hos Ulstein Betong
Ulstein Betong skal bygge flytemoloane medan ventemerdene i betong blir produsert hos Etne Betong i Etne. Ei ventemerd er ei merd der laksen blir oppbevart inntil den blir pumpa inn i slakteriet.

Cflow i Langevåg skal levere anlegget som handterer fisken frå ventemerd og inn i slakteriet.

Auka satsinga på oppdrett
Marina Solutions leverer marinaanlegg, flytande hamner, fôrflåter og andre større flytande konstruksjonar i betong. Basen er Ørsta, men selskapet har salskontor på Eidsnes og lager på Bingsa.

Mellom anna satsinga mot sjømatnæringa med oppretting av eigen akva-avdeling, har gitt langt høgare omsetning for Ørsta-bedrifta dei siste åra.

Det har også gitt fleire i arbeid – og bedrifta gjekk frå 18 til 22 årsverk frå 2021 til i fjor.