Rekordresultat etter gevinst frå skipssal

Fjoråret blei eit svært godt økonomisk år for selskapa til Paul Harald Leinebø og familien.

PHL Holding-konsernet hadde ei omsetning på totalt 654 millioner. Selskapet eig drygt halvparten av Leinebris-reiarlaget med base i Herøy. I konsernet ligg også heileigde PHL Seagold, som driv med kjøp og sal av fisk.

Gevinst på fartøysal gjer at resultat før skatt vart rekordhøge 56 millionar kroner for fiskebåtreiarlaget i fjor.

Leinebris fiskar hovudsakleg torsk, sei og hyse, og salsinntektene stoppa i fjor på 105 millionar – medan anna driftsinntekt på drygt 55 millionar, gjer det store overskotet (sjå tabell under).

Selde Leinebris til dotterselskap
Forklaringa på salsinntektene på 235 millionar kroner - som går fram av notane i årsmeldinga - er at selskapet selde linebåten Leinebris, til dotterselskapet Urvaag, fortel Paul Leinebø til NETT NO.

Reiarlaget kjøpte Averøy-selskapet som tidlegare heitte Husby Senior, på tampen av 2021. I fjor skifta dei namn på selskapet til Urvaag. Leinebris skal helde fram å fiske for dette selskapet, til «Nye Leinebris» blir levert i 2025.

– Ettertrakta og godt betalt fisk
Leiinga skriv at dei ser positivt på det neste driftsåret. Det er stor etterspurnad etter norsk fisk og «stendig» auke i prisane på dei fleste fiskeslaga.

– Vi registrerer at linefisket er ettertrakta og godt betalt fisk, ja faktisk den best betalande fisken i marknaden, og at særleg mykje av denne fisken går godt i daglegvarebutikkane, skriv leiinga vidare i årsmeldinga.

I fiskeriverksemda var det sysselsett 35 årsverk i 2022, nokre færre enn dei 42 året før.

Har bestilt nybygg
Leinebris-reiarlaget er eigd av Paul Harald Leinebø i Herøy og Åge og Øyvind Uran med fleire på Averøya etter at dei to reiarlaga slo seg saman og bygde dagens «Leinebris» i 2015.

Reiarlaget bestilte tidlegare i år eit nybygg teikna av Skipsteknisk i Ålesund, som skal vere klar til levering i juni 2025.

Den nye kombinerte line-, garn- og snurrevadbåten skal byggast av Tersan Shipyard i Tyrkia og vert 67,3 meter lang og 15,00 meter brei. Kystmagasinet har tidlegare anslått prisen til om lag ein halv milliard kroner.

Stor auke i fiskesalet
I Leinebø-konsernet ligg også selskapet PHL Seagold, som driv med kjøp og sal av fisk. Her peika utviklinga av inntektene rett opp i fjor. Omsetninga auka frå 325 millionar i 2021, til 546 millionar kroner i 2022, som er ny rekord med solid margin.

Lønnsemda vart likevel svakare med eit resultat før skatt på 5,6 millionar (sjå tabell under).

Salsinntektene i Europa auka frå 240 til 336 millioner, og til USA auka salet ekstraordinært frå 62 til 176 millionar i fjor. I år er omsetninga meir tilbake på normalen, ifølgje Leinebø.

PHL Seagold-selskapet sysselsette fem årsverk i fjor, og er heileigd av Paul Harald Leinebø.

Normalisert etter koronapandemien
Mykje av fisken frå selskapet endar som fish and chips-måltid i Storbritannia. Her har marknaden normalisert seg etter koronapandemien, og overgangen etter Brexit har gått greitt, skriv leiinga i årsmeldinga.

Trass stor prisauke på norsk fisk, opplever salsselskapet stor etterspurnad, godt hjelp av svak kronekurs og lågare tilgang på råvarer i marknaden.

Som følgje av krigen i Ukraina, vel også fleire fisk frå Norge, framfor Russland, skriv leiinga.