Resultathopp for Ulstein Group

Ulstein Group-konsernet har ikkje hatt høgare resultat før skatt (i nominelle kroner) enn i fjor, sidan 2014. Og driftsinntekta i 2024 er den høgaste sidan åra 2008 og 2009.

Det familieigde verft-, utstyr- og skipsdesignkonsernet leverte mellom anna to konstruksjonsstøttefartøy til Olympic-reiarlaget i fjor, hadde 13 skipsdesignkontraktar i arbeid, 18 service- og ettermarknadsoppdrag i regi av Ulstein Verft og datterselskapet Ulstein Power & Control har ein portefølje på 450 skip med service og garantiavtalar.

– Målet vårt på lang sikt er å minimere effekten av dei sykliske variasjonane i den maritime industrien ved å fokusere på ettermarknad og ombyggingar, digitale produkt og tenester, saman med skipsbygging, design og løysingar, skriv Ulstein Group i ei pressemelding.

Ulstein Group har over 250 aksjonærar. Største eigar, med 63,9 prosent, er selskapet Ulsmo. Ulsmo er eigd av søskena Gunvor, Tore, Idar Marius, Vegard, Ingerid og deira familiar.