Verftskonkurrentar samarbeider om forsvarskip

Ulstein Group og Larsnes Mek. Verksted jobbar saman om å kunne levere dei 28 standardfartøya for Sjøforsvaret, ifølgje ei pressemelding. 

Målet er dei to verfta i Ulstein og Sande saman skal levere dei nye fartøya til det norske Sjøforsvaret.

Administrerande direktør Lars Lühr Olsen i Ulstein Verft og dagleg leiar Jarle Gunnarstein i Larsnes Mek. Verkstad meiner dette er ei strategisk viktig moglegheit for norsk verftsindustri, og er klare til å levere både kvalitet og kapasitet i tråd med Forsvaret sine behov, blir det opplyst i meldinga. 

Leverte felles svar på undersøking
Forsvarsmateriell (FMA) gjorde nyleg ei marknadsundersøking for å kartlegge industrien sine evner til å levere til det omfattande fartøyprogrammet. 

Ulstein og Larsnes leverte eit felles svar – og har allereie hatt fleire møte med FMA for å diskutere korleis eit slikt oppdrag kan løysast i samarbeid mellom verfta. 

Begge sunnmørsverfta har moderne fasilitetar med overbygde tørrdokker som er ideelle for bygging og utrusting av denne typen marinefartøy, heiter det i meldinga. 

Har vore på synfaring ved verfta
Dei to verfta trekk også fram at dei begge har langsiktige og pålitelege forretningsforbindelsar i Gdynia–Gdańsk-området i NATO-landet Polen. Her er det mogleg å bygge skroga til dei nye forsvarsskipa. 

Sluttmontering og utrusting skal skje ved dei norske verfta. Det er eit mål at utstyret om bord i hovudsak skal kome frå norske leverandørar. 

Meir om dei store skipsbyggingsoppdraga til forsvaret

Førre veke var FMA ei synfaring ved begge verfta. Då blei det mellom anna diskutert korleis eit eventuelt samarbeid kan organiserast for å møte Forsvaret sine krav til kvalitet, leveringssikkerheit og nasjonal verdiskaping.

Skal byggjast i Norge
Det norske forsvaret skal bygge opptil 28 standardiserte fartøy og fem fregattar i løpet av dei ti neste åra. Standardfartøya skal byggjast i Norge – og fleire norske aktørar vil også bygge fregattane her til lands. 

Anslaget på verdien av skipsbyggingskontraktane varierer ein plass mellom 200 og 300 milliardar kroner. 

Det er ikkje kjent kva tid det blir teke ei avgjerd om kven som sikrar seg oppdraga. Ulstein-konsernet er også med i kampen om å bygge fregattar i samarbeid med tyske Thyssenkrupp.

Forsvarsmateriell skal stå for innkjøpa av dei nye skipa til forsvaret og Nett No fekk nyleg opplyst at dei ventar på grønt lys frå forsvarsdepartementet for å sette i gong eit forprosjekt for dei standardiserte fartøya.