Ser slutten på skipssal

Avtalen om sal av fem fartøy - to plattformforsyningsskip og tre ankerhandteringsfartøy - som har lege i opplag er ein del av refinansieringsavtalen med kreditorane. Avtalen blei inngått i 2020.

I løpet av andre kvartal i år vart tre av fartøya selde, og dei to siste ventar Havila Shipping å få seld i løpet av tredje kvartal i år, skriv selskapet i ei børsmelding.

Havila Shipping bokfører ein gevinst på 95,6 millionar kroner, som er eit viktig bidrag til betringa i lønsemda både i 1. halvår og 2. kvartal i år samanlikna med same periode i fjor. (Sjå tabell)

Selskapet hadde hatt overskot på drifta også utan salsgevinsten i første halvår i år, medan driftsresultatet 1. halvår 2021 var minus 32,8 millionar kroner.

Justert for salsgevinstar og valutaendringar som slo negativt ut har selskapet no eit resultat før skatt omlag i balanse, seier dagleg leier Njål Sævik til NETT NO.

"Markedet for selskapets fartøy har i andre kvartal vært bedre i alle segmenter enn tilsvarende periode i 2021," skriv Havila Shipping i delårsrapporten for 1. halvår og andre kvartal.

Selskapet driv 19 offshorefartøy, mellom dei seks for andre eigarar. Frårekna skipa i opplag var utnyttingsgraden av flåten på 93 prosent i 2. kvartal.