Sju raad mot moderne slaveri
LANDSOMFATTANDE PROBLEM: Dagleg leiar Sondre K. Høysæter i Hope for Justice seier organisasjonen arbeider med saker om grov utnytting av utanlandsk arbeidskraft også i Ålesundområdet.
Nytt

Sju råd mot moderne slaveri

Sondre K. Høysæter har sju spørsmål du bør stille dine innleigde utanlandske arbeidstakarar for å unngå å bli del av det Hope for Justice karakteriserer som moderne slaveri.

31.01.2020
Høysæter er leiar for den norske avdelinga av organisasjonen Hope for Justice, som arbeider mot internasjonal menneskehandel og moderne slaveri - der utanlandske arbeidstakarar blir utnytta.
Hope for Justice er mellom anna sentral i den såkalle Fagarbeideren- saka
Det er snakk om eit landsomfattande problem, i følgje Høysæter.
- Vi har blitt kontakta av personar som har jobba i Ålesundsområdet, som har blitt utnytta på det grovaste, seier Høysæter. Det er ei sak organisasjonen arbeider med no.

Ansvarleg

I dag deltok Høysæter på eit frukostmøte i Ålesund der bruk av utanlandsk arbeidskraft var tema. Adviso Advokatfirma, rekrutteringsselskapet Yapril og Hope for Justice var arrangørar.
Regelverket er slik at den eigentlege oppdragsgivaren er ansvarleg for arbeids- og lønsvilkåra også for arbeidskraft som er innleigd gjennom arbeidskraftutleige og - formidlingsselskap.
Høysæter har sju spørsmål oppdragsgivarar bør stille utanlandsk arbeidskraft for å forsikre seg om at dei har løns- og arbeidsvilkår innanfor regelverket. Ja på desse spørsmåla bør få alarmklokkene til å ringe:
  • Betalte nokon reisa di hit?
  • Tek nokon frå deg pengar for å betale ned på gjeld?
  • Blei du love ein jobb som ikkje eksisterer?
  • Blir du frakta til og frå jobb?
  • Er du utan tilgang til dine eigne ID-papir?
  • Jobbar du for lite eller inga løn?
  • Føler du deg lurt eller truga til å gjere noko mot din vilje?

Naivitet

Høysæter peikar på bygg- og anleggsbransjen, reinhaldsbransjen, fiskeindustrien, bilpleiebransjen og landbruk der utanlandsk arbeidskrav på dårlege vilkår er utbredt.
Han meiner det norske samfunnet har undervurdert omfang og problem med omfattende bruk av utanlandsk arbeidskraft med dårleg løn og arbeidsvilkår.
Dei direkte ofra er dei som blir utnytta, men ringverknadane er negative også for seriøse bedrifter som held seg til norsk lønsnivå og arbeidsvilkår og for rekrutteringa til yrke der det er ein omfattande bruk at arbeidskraft på dårlege vilkår.
- Dessverre har vi hatt døra på gløtt og vore naive for lenge, seier Høysæter.

Publisert: 31.01.2020 16:30

Sist oppdatert: 10.02.2021 14:51