Sjøsette nye Leinebris: – Har vore ein kjempedag

Fredag var det høgtideleg seremoni for sjøsettinga nye Leinebris ved Tersan-verftet i Tyrkia. 

Representantar for Herøy-reiarlaget var på plass og hovudaksjonær Paul Harald Leinebø fortel om ein god dag på alle måtar. 

– Båten flyter og det har vore ein kjempedag. Vi hadde besøk av representantar frå styresmaktene med talar og ein fantastisk seremoni, seier han til Nett No etter arrangementet. 

Dei kring 5000 verftsarbeidarane deltok også på markeringa då skroget kom på vatnet. 

I rute for levering til sommaren
Leinebø fortel at dei ligg godt an til levering av båten til sommaren som planlagd. 

– Vi er heilt i rute, og både verft og leverandørar held det dei lovar. Så langt ser det veldig bra ut, seier reiaren. 

Styreleiar Åge Uran i Leinebris er den som følgjer byggeprosjektet tettast, og har vore på plass ved verftet for å følgje framdrifta. I tillegg har dei innleigde inspektørar. 

Nyskapande båt
Nye Leinebris blir ein båt litt utanom det vanlege. Det er snakk om ein kombinert line-, garn- og snurrevadbåt med stor batteripakke og tre generatorsett for diesel-elektriske framdrift. 

Dei blei jobba mykje med å nyttiggjere all energi som produserast om bord, og båten har elektrisk dekksutstyr og vinsjar.

Båten får ei lengde på 67,30 meter og ei breidde på 15 meter. 

Designa av Ålesund-selskap
Nybygget er teikna av designselskapet Skipsteknisk i Ålesund, som også var med på seremonien i Tyrkia fredag. 

Det same var representantar frå Eksfin, Sparebank 1 SMN og Sparebank 1 Nordmøre, som har vore med å støtte prosjektet.

Fiskebåtreiarlaget Leinebris as er eigd av Paul Harald Leinebø i Herøy og Åge og Øyvind Uran med fleire på Averøya etter at dei to reiarlaga slo seg saman og bygde dagens «Leinebris» i 2015.