Hydrogenselskap skal doble staben

To av dei nye stillingane går til datterselskap Norwegian Hydrogen har oppretta i Sverige og Danmark, medan storparten av resten av dei nye stillingane blir på hovudkontoret i Ålesund.

Det fortel Marielle Furnes Mannseth, merkevare- og berekraftleiar i selskapet.

I dag har Norwegian Hydrogen 10 tilsette.

Fabrikk på Hellesylt
Norwegian Hydrogen skal produsere, distribuere og bidra til at hydrogen blir tatt i bruk som energikjelde.

Den første fabrikken skal vere i produksjon på Hellesylt i 3. kvartal neste år.

Vil hente ein halv milliard
NETT NO skreiv i august i år at meklarselskapet ABG Sundal Collier er leigd inn for å hjelpe til med ei kapitalutviding på rundt ein halv milliard kroner. Den skal gjennomførast innan 12 månadar, sa Norwegian Hydrogen-sjef Jens Berge i august.

Emisjonsplanen blei kjent i samband med melding om at det japanske industrikonsernet Mitsui blir medeigar gjennom ein retta emisjon på 70 millionar kroner.

Mitsui-konsernet er allereie medeigar i dei børsnoterte selskapa Hexagon Composites (22,7 prosent) og Hexagon Purus (to prosent) - to selskap som begge har hatt Knut Flakk og familien som primus motor.

Flakk-familien er også største eigar i Norwegian Hydrogen, som planlegg fleire produksjon-, distribusjons- og fylleanlegg for hydrogen.