Skipsverft gjekk frå minus til pluss

Etter at det vart store tap i 2022, leverer Stadyard-verftet i Kinn eit rekneskap i pluss etter 2023.

I fjor sank omsetninga til 177 millionar, men i staden for underskot, vart det pluss-tall på botnlinja med eit resultat før skatt på 3,7 millionar (sjå tabell under).

Omsetninga er om lag det halve av nivået i toppåra 2020 og 2021.

Fekk tilført ny kapital
Etter eit underskot for verftet på nær 12 millionar i 2022, fekk selskapet tilført 24 millionar kroner frå eigarane i løpet av fjoråret, ifølgje årsmeldinga.

Ved utgangen av 2023 hadde selskapet eigenkapital på 27 millionar og ingen langsiktig gjeld.

Agnar Lyng er dagleg leiar og storaksjonær i verftet via Babord Industries. Malvin Silden, Knut Helge Sørpoll og Trond Kongshaug er også medeigarar via Verlo holding.

Har to byggekontraktar
Styret i verftet utanfor Måløy skriv i årsmeldinga at skipsbygging i Norge er prega av sterk konkurranse. Dei meiner resultatmarginen ikkje står i stil til kompleksiteten og risikoen forbunde med verksemda.

Framover har verftet byggekontrakt på to kystbåtar som skal leverast sommaren 2025. Elles har verftet oppdrag med reparasjon og vedlikehald, som har kortare horisontar.

I årsmeldinga fortel leiinga også om klager frå naboar på støy, og det er gjort tiltak på kort og mellomlang sikt.