Norske Skipsverft: - Ting går rett veg

NETT NO-barometeret:

Så langt i år har norske skipsverft offentleggjort nybyggingskontraktar for 8,5 milliardar kroner. Det er to milliardar kroner meir enn i heile 2022, ifølgje statistikken til sal- og marknadsføringsorganisasjonen Norske Skipsverft.

Nybyggingskontraktane hittil i år er fordelt på 22 fartøy. Det er like mange som i heile 2022, som betyr at gjennomsnittsprisen for dei fartøya som er bestilt frå norske verft er høgare i år enn i fjor.

• Under vignetten NETT NO-barometeret ser vi på korleis det går med bransjar på Nordvestlandet. Dette er fjerde artikkel.

Ordreboka til skipsverfta, storleiken på skip i bestilling, eller i arbeid, er på 34 milliardar kroner fordelt på 58 fartøy.

På same tidspunkt i fjor var ordreboka på 28 milliardar kroner, fordelt på 57 fartøy.

Betra lønsemd
Store underskot hos Vard (sjå tabell under) gjorde at skipsverfta også i fjor gjekk i minus samla sett.

Men bransjen betrar lønsemda, også når Vard vert halde utanfor reknestykket. I 2020 gjekk 12 av selskapa i NETT NO si oversikt i minus. I 2021 var det ni og i fjor var det åtte.

Vard har også greidd å redusere underskota, frå minus 1,8 milliardar kroner i resultat før skatt i 2020, til minus 424 millionar i fjor.

Vegsund Slip og Aas Mek. Verksted
Vedlikehald-, reparasjon- og ombyggingsverftet Vegsund Slip og brønnbåtspesialisten Aas. Mek. Verksted er dei mest lønsame i NETT NO sin oversikt, rangert etter resultatmargin.

Resultatmarginen er resultat før skatt i prosent av driftsinntektene og var høvesvis 12,4 og 8,6 prosent for dei to verfta.

Administrerande direktør Asle B. Strønen i Norske Skipsverft meiner resultatutviklinga for verfta går rett veg.

– Ting går rett veg. I den differensierte verftstrukturen (i Noreg, red. merk) har storparten greie tal, seier han om lønsemda i bransjen.

Lobby-organisasjon
I tillegg til å drive marknad- og salsarbeid driv Norske Skipsverft med politisk påverknad.

Det viktigaste målet nett no er å få gjennomslag for ein såkalla forskotsgarantiordning, seier Strønen.

Han ønskjer seg at det offentlege verkemiddelapparatet skal få høve til å stille med garantiar som gjer at verfta kan garantere at kundane skal få att pengane dei betalar på forskot, dersom verftet ikkje klarer å levere.

Fleire år med tap eller dårleg lønsemd har tæra på eigenkapitalen. Det gjer det vanskeleg for verfta å binde opp kapital og stille med garantien sjølve.

– Regjeringa må få verkemiddelapparatet på banen, seier Strønen.

Kan stille krav
Strønen meiner politiske krav og mål om å få ned CO2-utslepp frå skipsfart kan - om det er politiske vilje - medverke til fleire nye oppdrag for norske verft.

Det er snakk om teknologiutvikling, der regelverket i større grad opnar for å styre desse kontraktane til Noreg. Det gjeld mellom anna når nye hurtigbåtar skal byggast og fartøya som opererer i vind- og oljebransjen skal over til energiberarar som ikkje gir CO2-utslepp slik tradisjonelle dieselmotorar gjer.

Les årets resultatsaker for verfta under tabellen