Slettvoll opnar butikk i København

Etter å ha brukt ett år på å finne det rette lokalet opnar Slettvoll-konsernet butikk i København i oktober i år, den første butikken i Danmark.
Frå før har selskapet tre butikkar i Sverige, i Stockholm, Gøteborg og Malmø.
Forventninga er at satsinga i Sverige og Danmark skal stå for den største veksten for konsernet framover, i følgje administrerande direktør Bjørn-Helge Vik.
Vik tok over etter Kristine Landmark 1. juni i år.

Tunge investeringar

Slettvoll-konsernet fekk ei klart lågare lønsemd i 2018 enn i 2017 (sjå tabell) og Vik reknar med at lønsemda i år vil ende omlag som i fjor.
Det er fleire tunge investeringar som dreg overskotet ned i følgje Vik; ombygging av fabrikken på Stranda, ombygging av eigne butikkar og ny IT-infrastruktur.

Først i 2020, når investeringane er gjort, vil selskapet sjå ei auke i lønsemda igjen.

Nettbutikk

I tillegg til fabrikken på Stranda har Slettvoll-konsernet 19 butikkar. Åtte er eigd av selskapet sjølv, 11 er sjølvstendige butikkar med franchiseavtalar om å vere Slettvoll-forhandlar.
Den nye IT-infrastrukturen til selskapet omfattar alt frå innkjøp av deler og råvare, produksjon og distribusjon, og nettside og nettbutikk for kundane.
- Vi lanserer ny heimeside ganske snart, seier Vik.
I første omgang blir det opna for netthandel med interiørvarer, og så blir det vurdert om det eventuelt skal opnast for å handle møblar på nettet. Netthandel er uansett ikkje det viktigaste i følgje Vik, men å gjere det lettare for kunder å orientere seg på nett, før han eller ho går i butikken.
Slettvoll har sett at det kjem færre folk i butikkane, men at snitthandelen gjekk opp.
Den trenden har berre forsterka seg, seier Vik.

Familieselskap

Slettvoll Møbler er eig av selskapet SM Bygg der Torill Slettvoll eig knappe 50 prosent av aksjane. Dei andre eigarane er Live Slettvoll Myklebust, Mari Vik Slettvoll og Anne Lise Slettvoll.
Konsernet sysselsette 84 årsverk i fjor.