Slik vil regjeringa styrke landbruket

Inntektene til bøndene skal samanliknast med lærarar og sjukepleiarar, ikkje industriarbeidarar. Og dyra skal ete meir grovfôr og gras, i staden for kraftfôr.

Det er blant dei viktigaste punkta i stortingsmeldinga som blir lagd fram av landbruks- og matminister Geir Pollestad (Sp) og næringsminister Jan Christian Vestre (Ap) fredag. Der skal regjeringa fortelje korleis dei skal auke sjølvforsyningsgrada til 50 prosent og trappe opp inntektsmoglegheitene i landbruket.

Sjå direktesending frå pressekonferansen der stortingsmeldinga blir presentert (ekstern lenke)

50 prosent sjølvforsyning
Auka sjølvforsyningsgrad – det vil seie at meir av maten vi treng for å klare oss, skal kunne produserast i Noreg – er eit mål som eit breitt fleirtal på Stortinget er samde om. Regjeringa vil nå eit mål om 50 prosent sjølvforsyning, og i planen deira skal dei presentere tiltak som skal føre til:

* Auka etterspurnad etter mat frå norsk jordbruk

* Auka produksjon av, og etterspurnad etter norsk frukt, grønt og matkorn

* Auka bruk av grovfôr og gras

* Auka del norske råvarer i kraftfôret

Må levere varer forbrukarane vil ha

Pollestad understrekar at dette er avhengig av at norsk jordbruk leverer produkt som forbrukarane vil ha, og føreset lønnsemd i produksjonen.

– Oppfølging av strategien må skje i samarbeid mellom staten og alle ledd i verdikjeda for mat, seier han i ei pressemelding.

Oppdaterer inntektsgrunnlaget
Bøndene har også venta lenge på noko heilt anna: Ein oppdatert måte å berekne inntektene deira på. Budsjettnemnda for jordbruket skal leggje fram tala i dei nye talgrunnlaget allereie før jordbruksoppgjeret i vår.

Mellom anna skal det no blir lagt opp til å samanlikne jordbruksinntekta med «eit justert gjennomsnitt av lønn for arbeidstakarar som er om lag på nivå med lønn i undervisningsyrke og helserelaterte yrke».

Dette blir ifølgje regjeringa om lag 9 prosent over industriarbeidarlønna – som var samanlikningsgruppe førre runde med lønnsopptrapping frå midten av 1970-talet.