Stifting gir storpott til Aasenkvartalet

Sparebankstiftinga Søre Sunnmøre gir 15 millionar kroner til storsatsinga Aasenkvartalet i Volda.

Pengane skal gå til å delfinansiere ei kultur- og konferansescene i tilknyting til å realisere utviklingsprosjektet på høgskuleområdet, ifølgje ei pressemelding frå stiftinga. 

Det er Volda kommune som sende inn søknad om slik støtte. Tildelinga er den største som er gitt av stiftinga. 

Håpar å starte bygginga om eitt år
Volda ordførar Sølvi Dimmen meiner at kultur- og konferansescena vil vere eit nav i eit samla sambruksprosjekt. 

Ho fortel til Nett No at dei håpar at byggearbeidet kan starte om eitt års tid. Kor lang tid byggeperioden vil vare, tør ho ikkje seie på sparket. 

Byggetrinn 1 og 2 kjem samtidig og inneheld mellom anna hotell, kulturscene og Norsk Innovasjonssenter. I tillegg kjem  andre leigetakarar frå offentleg og privat næringsliv. 

Det er også planar om å få på plass eit helsehus i prosjektet, ifølge Dimmen. 

Sparebankstiftinga har lagt vekt på at det er snakk om eit regionalt prosjekt der formålet med det samla konseptet er å skape synergiar og nye arbeidsplassar. 

Dagleg leiar Arne Lothe i Sparebankstiftinga Søre Sunnmøre, seier det er viktig for stiftinga å vere med og styrke grunnlaget for utvikling av lokalsamfunnet og regionen.

– Særleg viktig er dei demografiutfordringane vi står overfor med skjerpa konkurranse om arbeidskrafta og studentar og dessutan sentraliseringskreftene frå dei større byane uttalar Lothe vidare.