Stoppa permitteringar: Ja til redusert arbeidstid og løn

- Kravet var at alle skulle seie ja for at vi skulle innføre ordninga. Alle 60 sa ja på eit allmøte fredag, seier adm. dir. Håvard Ulstein i Island Offshore.
Han rosar dei tilsette.
- Vi har eit fantastisk miljø på kontoret, og her er alle kollektivt innstilte på å bidra for å kome oss over den kneika vi er inne i.
- Alternativet hadde vore permitteringar, og deretter mulege oppseiingar. Det er den løysinga mange andre har valt.

Opplag og utsetjingar

Endringane gjeld frå 1. august, og varer så lenge marknadssituasjonen tilseier det.
Island Offshore har tre båtar i opplag. I tillegg er nybyggingsoppdrag utsette.
- På grunn av dette har vi no for mange tilsette på land.
- Samstundes er vi sikre på at marknaden kjem tilbake, og at vi vil trenge alle desse 60 tilsette. Derfor er vi svært glade for den løysinga som er valt.

Lys i tunnelen

Håvard Ulstein seier at han alt ser teikn på at marknaden er i ferd med å endre seg til det betre på enkelte område.
- Det er tøffe tider, men vi er sikre på at det vil snu. For kvar dag som går, er vi nærare at det skjer.
- Der er lys i enden av tunnelen, seier Ulstein.