Stortinget skrotar småkraft-skatteauke

NPK-NTB: Stortingsfleirtalet fredar dagens nivå for skatt for småkraftverk. Det blir ikkje noko av planen om å senke terskelen før grunnrenteskatten slår inn.

Ap-regjeringa ønskte opphavleg å senke terskelen for grunnrenteskatt for småkraftverk frå dagens nivå på 10 megawatt (MW) til 1,5 MW.

Torsdag vedtok eit fleirtal i Stortinget, med Sp, Venstre, Høgre og Frp, at innslagspunktet for vasskraft ikkje skal senkast.

– Skal vi få ned dei høge straumprisane, treng vi meir kraft, og småkraft kan gi mykje rein energi relativt raskt. Det er viktig å skape føreseielegheit slik at vi får realisert fleire slike prosjekt. Dessverre vel regjeringa å gjere det motsette, og derfor var det aldri tvil om at Høgre skulle bidra til å stoppe dette forslaget, seier Høgres energipolitiske talsperson, Aleksander Stokkebø.

Høgre meiner at forslaget frå regjeringa om å senke nivået ville bety at i underkant av 800 nye kraftverk på mellom 9,9 og 1,5 megawatt måtte betale grunnrenteskatt.

Då saka var til behandling i energikomiteen på Stortinget, viste Raudt og Ap til at det sidan 2020 har vorte sett i drift 180 kraftverk under den nedre grensa på rundt 10 MW, medan det berre er sett i drift eitt kraftverk mellom 10 og 20 MW.

Men ifølgje Småkraftforeningen, som viser til tal frå Noregs vassdrags- og energidirektorat (NVE) er det sett i drift 201 småkraftverk, der 15 av dei er rett under 10 MW. (innanfor spennet 9–10 MW.). Dei peikar også på at det er sett i drift tre anlegg mellom 10 og 20 MW.