Støre opna hydrogenfabrikken på Hellesylt

(NPK-NTB): Hellesylt Hydrogen Hub skal produsere utsleppsfritt drivstoff på Sunnmøre med bruk av vasskraft. Onsdag vart fabrikken opna med statsministeren til stades.

– Hellesylt Hydrogen Hub er eit slags kinderegg. Det bidreg til utsleppskutt og næringsaktivitet på Sunnmøre, men også til at vi får meir ut av dei fornybare kraftressursane våre, seier statsminister Jonas Gahr Støre (Ap).

Han var til stades under den offisielle opningsseremonien på fabrikken onsdag. Testproduksjonen starta allereie i sommar.

Pilotanlegget skal bidra til at tungtransport, ferjer, cruiseskip og hurtigbåtar i regionen kan bli utsleppsfrie ved å bruke hydrogen. Fabrikken vil ha ein maksimal produksjonskapasitet på 1,3 tonn, opplyser regjeringa.

– Hydrogen ein av dei mange løysingane vi treng for å nå klimamåla våre. Regjeringa vil bidra til å byggje opp samanhengande verdikjeder for hydrogen som er produsert med låge eller ingen utslepp. Derfor speler vi på lag med industrien, mellom anna med fleire offentlege tilskots- og låneordningar og samarbeid med EU, seier Støre.

Anlegget i Hellesylt på Sunnmøre har eit budsjett på 100 millionar kroner. Det har fått 47 millionar kroner i støtte gjennom statlege Pilot-e, som skal få fram nye, konkurransedyktige bedrifter innan miljøvennleg energiteknologi.