Fekk signal om meir pengar til hydrogen

– Velkomen til opninga av den første hydrogenfabrikken til Norwegian Hydrogen her i Hellesylt. Det vil bli mange fleire, sa styreleiar Knut Flakk då Hellesylt Hydrogen Hub vart opna onsdag.

Statsminister Jonas Gahr Støre stod for sjølve den høgtidelege opninga av Norwegian Hydrogen sin fabrikk for produksjon av sokalla grøn hydrogen.

Begge var samde om at dette var liten milepåle for det grøne skifte, med omlegging til mindre utslepp frå mellom anna skipsfart og trafikk på landevegen.

Vil vurdere auka støtte
Både Norwegian Hydrogen-sjef Jens Berge og styreleiar Knut Flakk etterlyste likevel eit større tempo både i bygging av infrastruktur for hydrogen og kraftnettet.

Under statsministerens tale fekk dei positive signal då Støre sa det kan bli meir støtte å hente til ulike typer hydrogenprosjekt enn det er i dag.

– Det er noko vi er nøyd til å vurdere, sa han – utan å gå konkret inn på kva måte.

Styreleiar Flakk oppfatta uttalen som eit skritt i rett retning sett frå deira ståstad: – Eg gjorde det, så får vi sjå kva som kjem, la han til.

– Tyngst å dra i gong
Medan bygging av fartøy og produksjon av hydrogen kan få støtte til opptil 80 prosent, er den øvre grensa på 40 prosent av kostnadane for andre type hydrogenprosjekt.

Flakk og Berge håpar at til eksempel bygging av infrastruktur kan vente seg meir offentleg støtte.

– Infrastrukturdelen er den som er tyngst å dra i gong. Vi er avhengig av å få på plass både køyretøy som nyttar hydrogen og fyllestasjonar, fortel Flakk.

– Ein høna og egget-situasjon
Flakk understrekar at det blir dårleg business for ein fabrikk som lagar hydrogen til 100 lastebilar, så lenge den berre har ti kundar.

– Det tek tid å bygge opp, og difor må støtta vere vesentleg høgare, seier Flakk.

– Det er ein høna og egget-situasjon, om vi ikkje får infrastrukturen på plass, får vi heller ikkje nok tyngre køyretøy over på hydrogen, la han til.

Flakk påpeiker samtidig at eit øvre totalt støttebeløp på ti millionar – som reglane seier i dag – hjelper lite om den totale investeringa er fleire gonger høgare.

Støre: «Mission possible
– Eg er glad for at ingen brukte poenget om at dette er «Mission Impossible», sa Jonas Gahr Støre før han opna fabrikken offisielt. Han peika mot fjellet Helsetkopen der Hollywood-stjerna Tom Cruise hoppa utfor med motorsykkel i nemnte film.

– For dette er nemleg «mission possible», la han til og viste til at han meiner det faktisk er mogleg å takle klimautfordringane nasjonen står ovanfor.

Under opninga viste Støre også til korleis styresmaktene allereie gir betydeleg støtte for å auke tempoet i det grøne skiftet mellom anna med storsatsing på karbonlagring.

– Men vi treng både meir straum og infrastruktur for å få straumen fram dit den trengst, la han til.