Advokatkostnadane drog ned

Havila Shipping la torsdag ettermiddag fram tal for 4. kvartal. Dei viste lågare inntekter og svakare resultat for reiarlaget i perioden. 

2025 som heilheit endar likevel med eit resultat før skatt i pluss – med samla inntekter på nær 650 millionar – opp frå 585 millionar året før. 

Aksjekursen til Havila Shipping har klatra opp frå start torsdag. Ein halvtime etter kvartalsrapporten blei lagt fram ved 15-tida, var kursen opp 8,76 prosent til 1,18 kroner. 

Sjå tabell under

Advokatrekningar tynger
I kvartalsrapporten kjem det fram at ei vesentleg årsak til auken i driftskostnadane for 4. kvartal, var rekninga til advokathonorar i samband med rettssaka mot tre bankar. 

Reiarlaget tapte saka i tingretten, og har anka til lagmannsretten. Selskapet har utsatt refinansiering i påvente av ein rettskraftig dom i striden.

I rapporten skriv reiarlaget at styret meiner selskapet kan handtere ulike utfall av rettstvisten – og at det difor er grunnlag for vidare drift. 

Lågare flåteutnytting
Utnyttinga av skipa i 4. kvartal var lågare enn same kvartal i 2024, og låg på 91 prosent. Eitt av skipa hadde ei utnytting på 49 prosent i spotmarknaden, blir det opplyst i kvartalsrapporten. 

Havila Shipping har base i Herøy og driv 14 fartøy, seks av dei for andre eigarar. Reiarlaget hadde 402 sjøfolk i arbeid på skipa og 12 årsverk i administrasjonen i kvartalet. 

Les børsmelding (ekstern lenke)