Havila Shipping tapte mot bankane

Dommen blir anka, skriv Havila Shipping i ei børsmelding. 

Rettssaka mellom reiarlaget og dei tre bankane har i stor grad dreia seg om korleis ein skal tolke refinansieringsavtalen mellom partane. 

Kjernen i konflikten er at Havila Shipping tok opp eit obligasjonslån på 525 millionar kroner for å betale ut tre andre långivarar. 

Havila burde spurt om lov
Medan reiarlaget meiner det hadde rett til dette ut frå avtalen – meiner bankane at avtalen sperra for eit slikt låneopptak – og at Havila burde spurt dei om lov. 

Dei tre saksøkte bankane svara på låneopptaket til reiarlaget med å erklære at Havila Shipping hadde misleghalde låneavtalen, og bad om at gjelda blei gjort opp. 

Havila Shipping kontra med å saksøke bankane og meiner desse opptrer illojalt når dei krev å få gjort opp gjelda til reiarlaget.

350 millionar
Etter reiarlaget sitt syn forsøker dei tre bankane å «grabbe til seg» kring 350 millionar kroner dei ikkje har rett på – til ulempe for dei andre partane.  

Bankane på si side godtek ikkje forklaringa frå reiarlaget om at obligasjonslånet ikkje var ny gjeld – men eit ombyte. Dei meiner det er ny gjeld – som kravde samtykke  frå dei andre partnarane.

Havila Holding er største aksjonær i Havila Shipping. Havila Holding er medeigar i Bakkar og Berg Media, som gir ut NettNo.