Svakare frå Herøy-designerar

Herøy-selskapet Marin Teknikk reduserte innteninga i 2020, og fekk eit negativt driftsresultat.

Styret skriv i årsrapporten at ein merka konsekvensane av covid-19 med redusert reiseaktivitet og der enkelte prosjekt også vart utsette.

(saka held fram etter tabellen)

Superyacht
Ordreinngangen er også svakare enn året før, men styret forventar at aktiviteten vil ta seg opp att på slutten av 2021.

I august kunne dagleg leiar Svein Rune Gjerde også opplyse til NETT NO at selskapet var i gang med eitt av sine største prosjekt nokon gong. Det er designarbeid knytt til bygging av ein 112 meter lang og 18 meter brei yacht i megayachtklassen.

- Vi har jobba med dette prosjektet i fire år. Det har engasjert mange av våre tilsette i Dragsund, men også ved avdelingskontoret i Polen, i tillegg til at vi har leigd inn ingeniørar, opplyste Svein-Rune Gjerde.

Mannskap på 45
Om bord vert det lugarkapasitet for eit mannskap på 45 personar og i tillegg 36 gjestesuiter.

Det er dermed ein av dei største superyachtane som nokon gong er bygd i Spania.

Om bord kjem det også eige helikopter, fleire bilar, motorsyklar, landgangsfartøy og mykje ekstrautstyr.

Koronastøtte
Marin Teknikk har 48 årsverk, inkludert tilsette ved dotterselskapa i Szczecin og Gdansk.

I fjor fekk selskapet koronastøtte på 1,4 millionar kroner, anna offentleg støtte på 1,4 millionar og i tillegg 0,5 millionar kroner frå Skattefunn.

Selskapet har ein samla eigenkapital på 56,6 millionar kroner og ei langsiktig gjeld på 19,0 millionar.

Eigarane er i same familie, der Svein-Rune Gjerde er hovedaksjonær med 55 prosent av aksjane.