Syklar for sjømat - mot kreft

- Eg gler meg. Dette vert ei kjempeoppleving, seier 26-åringen frå Ålesund.
Han jobbar til dagleg i brønnbåtreiarlaget Sølvtrans, der faren Roger Halsebakk er direktør.
Men det var tildelinga av sykkel-VM til Bergen i september neste år som var opptakta til at Robin bestemte seg for å sykle Norge på langs - og følgje kystvegen heilt frå Grimstad til Kirkenes.
- Sjømatnæringa er hovudsponsor for sykkel-VM, så eg bestemte meg for å gje mitt bidrag for å fronte sykkel-VM, marknadsføre norsk sjømat og i tillegg samle inn pengar til kreftsaka.

Syklar med Dag Otto Lauritzen

Under VM skal i tillegg Sølvtrans sitt Kleven-bygde nybygg Ronja Diamond døypast i Vågen i Bergen, der Statsraad Lemkuhl normalt ligg.
Turen startar frå Grimstad i dag. Då skal den tidlegare sykkel-verdsmeistren Dag Otto Lauritzen sykle saman med Robin dei første fem mila til Lillesand, med eit innlagt stopp ved Hellesund fiskeoppdrett.
Men det er ikkje berre eks-proffar Halsebakk skal sykle saman med. Frå Kristiansand til Mandal får Halsebakk følgje av U23-verdsmeistren Kristoffer Halvorsen, som ei rekkje profflag jaktar.
Frå Obrestad til Stavanger er det samferdsleminister Ketil Solvik Olsen som slår følgje.
- Utruleg kjekt. Alle er så positive, seier Halsebakk.

Besøker sjømatbedrifter

Undervegs vert det turar innom ei rekkje sjømatbedrifter i dei 40 dagane sykkelturen varer.
- Vi prøvar å få med oss dei fleste. Og det er mange, seier Halsebakk.
Med seg har han Petter Gunnarstein, som også arbeider i Sølvtrans. Gunnarstein har med seg bubil, men har sjølv tenkt å vere med og sykle nokre av strekningane medan kona June overtek bubilen.
- Eg har i alle fall med meg sykkel, seier Gunnarstein.

Sandsøya og Kvamsøya

Han kjem frå Kvamsøya i Sande, medan Halsebakk-familien opphavleg kjem frå naboøya Sandsøya. Begge øyane får besøk av duoen under sykkelturen nordover.
- På begge stader håper vi å få med oss skuleelevar til å sykle saman med oss, seier Gunnarstein.

Kokk, teknikar og motivator

Han opplyser at i tillegg til å vere følgjebil skal han vere kokk, teknikar og motivator.
- Det viktigaste vert nok å vere motivator, seier Halsebakk, som har trena ein god del sykkel siste månadene. Frå før har han også bak seg to gongar Trondheim - Oslo, og ein gong Bergen - Trondheim.
Når det gjeld fokuset på kreftsaka, seier Halsebakk at det ikkje er mange år sidan hans morfar måtte gi tapt mot krefta, og i 2015 døydde ei tante etter kort tids behandling.
- Eg ønskjer også å front ein sunn livsstil, og målet er også at far min skal vere med på nokre etappar gjennom Nord-Norge.
- Han hadde hatt godt av nokre mil på sykkel, seier Halsebakk.