Tener endeleg pengar etter tøffe år

Cruise Service hadde eit rekordår i fjor med ny kraftig vekst i omsetninga.

Etter at inntektene bikka 50 millionar første gong i 2022, steig dei til 78 millionar i fjor. Det viser rekneskapen som no er offentleg.

«Cruise Service As ser lyst på 2024 og bestillingene på cruise har økt, og vi ser økt aktivitet i skuldersesong og på vinter», skriv styret i årsmeldinga.

Pluss etter fleire minusår
Reiselivsselskapet starta opp drifta for alvor i 2019. Etterpå vart det nokre utfordrande år for Langevåg-bedrifta, med pandemi og nærast full stans i cruisenæringa.

Deretter kom 2022 med omsetningsrekord og positivt driftsresultat. Men auka rente og prissjokk på diesel bidrog til at resultatet før skatt enda på minussida det året.

– Vi kan ikkje vere nøgd før vi begynner å tene pengar, sa Kåre Gunnar Molvær, dagleg leiar i Cruise Service til Nett No i fjor.

Etter fjoråret kan selskapet endeleg notere pluss-tal i rekneskapen (sjå under). Styret påpekar at 2023 blei det beste i selskapet si historie, men at rentenivået også påverka drifta meir negativt i fjor, enn den har gjort tidlegare. Dei legg til at likviditeten er anstrengt, men handterbar.

43 årsverk i jobb
Cruise Service i fjor sysselsette 43 årsverk, driftar tre fartøy i charter og turistmarknaden.

Flåten består av den tidlegare fjordabåten Bruvik frå 1949, hurtigbåten Gabriele og Keiser Wilhelm som tidlegare var kjent under namnet Rygerprinsesse.

Selskapet har også ferjedrift i Holmestrand som bidreg positivt til resultatet. Det er vidare investert i selskapet Trollfjord Experience, som har gitt gevinst.

Ronja Capital As og Kjølås Stansekniver As har er største eigarane i Cruise Service med kring 36 prosent kvar, Waterstone As har knappe 19 prosent og Molvær As har 9,5 prosent av aksjane i selskapet.